O Sergas non está a cubrir as baixas no servizo de Hematoloxía do CHUS, que se ve saturado

O sindicato médico O'Mega demandou ao Servizo Galego de Saúde (Sergas) a "inmediata cobertura" das baixas no servizo de Hematoloxía do Complexo Hospitalario Universitario de Santiago (CHUS). "Que desde hai anos viu conxelado o seu persoal facultativo a pesar do incremento da carga de traballo derivado do envellecemento da poboación e dunha maior taxa de supervivencia lograda coa aparición de novos tratamentos", sinala nun comunicado. Ademais, asegura que isto ocorre "sen que os responsables do centro sanitario nin da sanidade pública galega fagan nada para remediar un déficit que os facultativos están a pagar co seu tempo e, o que é peor, que os pacientes están a pagar coa súa saúde".

O sindicato médico indica que o servizo "leva sete meses sen responsable e dous meses con menos prazas das que figuran no seu cadro de persoal debido a que o Sergas non cobre as baixas de médicos adscritas a Hematoloxía no hospital compostelán, un centro de referencia que atende tanto a pacientes hematolóxicos como a oncolóxicos con vinculacións hematolóxicas". Por outra banda, afirma que "á falta de persoal súmase á carencia de espazos adecuados para prestar unha atención asistencial a pacientes de risco que aumentan progresivamente da man do envellecemento da poboación".

CHUS, Hospital Clínico de Santiago | Fonte: Sergas - Arquivo