Persoal da Administración galega concéntrase ante a Xunta para reclamar unha xornada de 35 horas

Decenas de traballadores públicos autonómicos participaron este mércores nunha concentración, convocada pola CIG, ante as dependencias da Xunta en San Caetano (Santiago), para urxir a aplicación da xornada de 35 horas para todo o persoal da Administración galega, así como un concurso de traslados aberto e permanente, e un novo sistema de promoción interna na función pública.

Estas son o "tres cousas básicas" que reclama a CIG-Autonómica, segundo explica a Europa Press o seu responsable de Organización, Alexandre Prieto, quen indica que estas accións de protesta perseguen que a Administración "espabile" e vaia "adaptando a xornada" á redución que acometerá o novo Goberno central de PSOE e Sumar.

De feito, é unha "reivindicación histórica da CIG" e algo que xa se está aplicando "en determinados colectivos" de empregados públicos autonómicos, como os das oficinas de turismo, máis aló dos profesores e os do Servizo Galego de Saúde (Sergas), ámbito onde estará aplicada a xornada semanal de 35 horas no ano 2025. Con todo, os traballadores comúns da administración segue coas 37,5 horas, é dicir, teñen agora unha xornada de 7,5 horas ao día. A terceira petición pasa por un cambio no sistema de ascenso por promoción interna, xa que as probas que convoca a Xunta "son tan duras como as de acceso libre" e supoñen examinar a funcionarios sobre temas dos que "xa demostrou capacidades". Fronte a este modelo, a CIG suxire unha vía alternativa como a formación e a valoración de anos de servizo. "O sistema actual non funciona", insiste Alexandre Prieto.

Concentración fronte ás dependencias da Xunta para urxir a xornada de 35 horas para todo o persoal autonómico. CIG | Fonte: Europa Press