O "falso piloto" que estafou a máis de 150 vítimas co famoso "timo do amor"
Movementos fraudulentos nunha conta de dúas veciñas de Cambados destapa a trama de ciberestafas, con 15 investigados.
Por Europa Press / Redacción | Cambados | 22/11/2023 | Actualizada ás 12:20
A Garda Civil de Pontevedra destapou unha trama de ciberestafas, con 15 investigados de diversos puntos de España e 7 persoas doutros países, como supostos integrantes dunha organización criminal que utilizaba o coñecido como 'timo do amor' para enganar ás vítimas.
As investigacións iniciáronse por mor da interposición dunha denuncia en Villablino (León), no ano 2020. Así, a Garda Civil descubriu que unha muller fora estafada e realizara transferencias a unha conta bancaria da localidade pontevedresa de Cambados, da que eran titulares unha nai e unha filla.
As pescudas do Equipo de Policía Xudicial da Garda Civil de Cambados permitiron constatar o elevado número de movementos fraudulentos que había nesa conta bancaria no último ano. Segundo puideron comprobar os investigadores, o tráfico de transferencias entrantes e saíntes superaba os 500.000 euros, polo que se procedeu ao bloqueo da conta.
Ao tirar deste fío, descubriuse a existencia dunha organización que creaba perfís falsos en varias redes sociais e plataformas de internet. Deste xeito, os delincuentes facíanse pasar por un "atractivo piloto" de aerolíneas que contactaba con mulleres de mediana idade.
'MODUS OPERANDI'
Tras gañarse a súa confianza e facelas crer que mantiñan unha relación amorosa, pedíalles diñeiro para distintos fins, alegando escusas como que estaba no estranxeiro e non podía acceder ás súas contas correntes, e pedíalles que enviasen diñeiro a unha conta dun terceiro.
Noutras ocasións, facíalles crer que lles enviou agasallos caros, como xoias, roupa ou perfumes desde o estranxeiro, e solicitáballes diñeiro para desbloquear pagos en aduanas, en aeroportos ou a transportistas, en concepto de supostos impostos ou aranceis.
Cando a organización recibía o diñeiro na conta corrente facilitada, rapidamente (en ocasións en cuestión de minutos) transferíana a outras contas distribuídas por toda España e polo estranxeiro, para dificultar o seu rastrexo por parte dos investigadores.
Con este 'modus operandi', a organización foi capaz de estafar a máis de 150 persoas, utilizando unha armazón de 18 contas bancarias e máis de 50 liñas de teléfono, tanto nacionais como internacionais.
