Novas incorporacións ao Catálogo de Árbores singulares: dúas sobreiras en Valga e unha formación de 14 en Tomiño
Estímase que poden ter máis de 200 anos.
Por Europa Press / Redacción | SANTIAGO DE COMPOSTELA | 22/11/2023 | Actualizada ás 14:34
A Xunta incorporou ao Catálogo de Árbores singulares de Galicia dúas sobreiras situados no municipio pontevedrés de Valga e unha formación de 14 exemplares desta mesma especie en Tomiño. En concreto, trátase das Sobreiras da Capela dos Mártires de Valga, dous exemplares cunha idade estimada de máis de 200 anos que se localizan xunto a unha antiga necrópole na parroquia de San Miguel.
De feito, baixo estes exemplares hai dous féretros de granito, a rentes do chan e semisoterrados. O lugar atópase, ademais, no trazado dun antigo camiño sacramental que coincide coa actual Vía Mariana Luso-Galaica. En canto á formación das 14 sobreiras que se atopan na parroquia de Goián (Tomiño), distribúense en 4 grupos ao longo do atrio, á beira da capela de San Roque, espazo de interese histórico e patrimonial. A idade estimada dos exemplares está en máis de 250 anos.
O catálogo galego de árbores singulares é unha ferramenta aberta e en constante actualización, podendo propor a inclusión de elementos novos os seus propietarios, as administracións, os centros de investigación ou asociacións e aquelas entidades privadas ou públicas que teñan entre os seus fins estatutarios a protección da natureza. Na actualidade, forman parte do Catálogo un total de 192 elementos (151 exemplares e 41 formacións arbóreas) pertencentes a 84 especies diferentes.
