A Xunta pide liberalizar a peaxe entre Santiago e Dozón tras acordar BNG e PSOE rebaixas no pacto de investidura
Rueda lembra que o seu executivo xa paga a peaxe de Santiago a Lalín.
Por Europa Press / Redacción | SANTIAGO DE COMPOSTELA | 23/11/2023 | Actualizada ás 14:13
A Xunta de Galicia dirixirase ao Goberno do Estado para que asuma nos orzamentos xerais para 2024 a liberalización da peaxe da AP-53 entre Santiago e Dozón, de titularidade estatal. Na rolda de prensa posterior á reunión semanal do seu Goberno, o presidente da Xunta, Alfonso Rueda, sostivo que esta medida completaría o "esforzo" que fai a Xunta para que o tramo entre Dozón e Ourense, a AG-53, de titularidade autonómica, está libre de peaxes.
O máximo mandatario autonómico referiuse ao acordo de investidura alcanzado entre o PSOE e o BNG, que inclúe a implantación de rebaixas na peaxe deste tramo. "Visto que deste tema falouse e que estaba incluído nos pactos de investidura recentemente alcanzados, cremos que é o momento para empezar o ano que vén e conseguir que toda a autovía estivese libre de peaxes", dixo.
Rueda detallou que a Xunta sufraga con 9,5 millóns a peaxe na sombra do tramo entre Dozón e Ourense, correspondente á AG-53, para evitar que os usuarios teñan que pagar. "O que pedimos é que iso se complete no outro tramo, de forma que se poida facer toda a viaxe, entre Santiago e Ourense, sen custo", dixo.
O presidente da Xunta sostivo que o custo desta liberalización sería de 10,5 millóns. Unha partida que o Goberno galego pide ao Executivo estatal que inclúa nos orzamentos xerais do Estado para 2024. "É equiparable ao esforzo que está a facer a Xunta de Galicia e cremos que sería tamén unha enrome vantaxe", afirmou para sinalar que non se pide "máis esforzo" do que xa se fai desde as arcas autonómicas.
