Valdeorras, berce do Godello: idea forza da nova campaña promocional deste territorio amparado

O Consello Regulador da D.O. Valdeorras activou unha nova campaña promocional, creada pola axencia galega LAPERA, que quere potenciar os seus viños, especialmente o Godello. A iniciativa foi presentada o pasado 26 de novembro no Centro Cultural Avenida da Rúa por Araceli Fernández, vogal do organismo, que detallou os eixos centrais e obxectivos do conxunto de accións de comunicación e publicidade que pretenden contribuir a fortalecer o posicionamento e “a potencialidade dos viños da comarca entre diferentes públicos obxectivos e aumentar o seu grao de coñecemento para tentar acceder a novos mercados”.

A iniciativa quere axudar ás adegas na comercialización dos seus viños e facelo grazas a unha campaña publicitaria "moi profesional, cun innegable gancho e cunha forte compoñente creativa que se sustenta, como eixo central, na potencialidade do godello: verdadeiro buque insignia do noso territorio amparado”, sinalou Araceli Fernández.

"O GODELLO É DE VALDEORRAS"

A devandita campaña potencia os caldos de Valdeorras e céntrase moi especialmente nos viños elaborados a partir da variedade Godello. De feito, o lema central da campaña promocional é: O godello é de Valdeorras, e agora tamén e teu.

A estratexia publicitaria busca protexer o vínculo entre unha terra e as súas xentes, Valdeorras; e un viño que é a súa máxima expresión, o godello. A idea creativa é moi simple “e baséase en que cando algo forma parte de ti, perténceche e é teu, conforma o teu patrimonio. E só podes transmitir, doar ou legar o que verdadeiramente é teu. E esta historia é a que conta O Legado de Valdeorras, a historia dunha terra que entrega un viño ao mundo, para que sexa coñecido e desfrutado por todos”, explican dende a axencia publicitaria responsable da campaña, LAPERA.

Entre os obxectivos da campaña están crear un relato moi concreto artellado sobre a idea de que Valdeorras é o berce do godello. “O auténtico godello nace en Valdeorras e o xerme do que existe plantado en todo o mundo parte desta terra na que nos atopamos”, comentou Araceli Fernández.

"Valdeorras é o berce do godello"

O equipo de Goberno do Consello Regulador é consciente de que o godello goza de cada vez máis recoñecemento nos mercados e, por ese motivo, quere intensificar o seu posicionamento trasladando a idea de que se trata dun viño orixinal, moitas veces exclusivo (algúns deles forman parte do selecto grupo de brancos de España mellor puntuados na Guía de Parker) e puramente autóctono, rescatado da extinción alá polos anos 70 do pasado século.

ACCIÓNS A DESENVOLVER COA CAMPAÑA

Esta primeira fase da campaña, que comezou xa este luns 27 de novembro, desenvólvese a través dun spot que busca a identificación entre territorio e Godello. O anuncio amosa como se envían cartas a tres persoas ubicadas en diferentes partes domundo. Ao ler a misiva, descobren o seu legado. O texto da carta describe a herdanza e todo o que acompaña a este concepto e enfatiza os ítems de terra, clima, viticultura dun pobo e forma de facer.

O anuncio rodouse durante tres días en toda a comarca de Valdeorras e editouse en formato Cinemascope, que permite que as imaxes máis panorámicas poidan amosar toda a beleza da zona. Trátase dun formato típico nas películas que se proxectan nos cinemas pero que resulta novidosa en produción publicitaria.

Un spot busca a identificación entre territorio e Godello

"A campaña busca xerar expectación, espertar interese sobre o que estamos a contar, e crear a necesidade de seguir atentos á mesma para continuar vendo e descubrindo a historia completa que queremos trasladar”, comenta Araceli Fernández. Por iso, para xerar tráfico e audiencia creouse unha landing page, legadovaldeorras.gal, na que se amosa o anuncio íntegro e se pode acceder ás diferentes pezas e creatividades deseñadas.

Nesta primeira fase promocional, promoveranse accións para gañar visibilidade e impacto. Entre estas, a rotulación semiintegral dalgúns autobuses que conectan Galicia con diferentes puntos do país. Tamén se aposta por Internet a través da denominada compra programática como formatos Rich Media, de gran impacto, e en sites relevantes de interese para os públicos obxectivo da D.O.

Pensando en novas canles de comunicación como son os podcasts, concibíronse cuñas especiais para incluir nalgúns dos máis relevantes para o segmento de audiencia ao que se dirixe a campaña. Xunto a isto, a difusión terá en conta tamén as plataformas de televisión dixital, sen esquecer outros soportes máis tradicionais e de carácter offline como a presenza en blogs de recoñecido prestixio.