Unha vintena de granxas lácteas premiadas na VII edición dos premios Exceleite pola súa aposta pola calidade
Alfonso Rueda enxalzou o papel dos gandeiros galegos para "consolidar a Galicia como unha potencia láctea", un sector "crave" para a comunidade e un dos principais motores do rural. "Grazas a vós, o noso leite ten recoñecemento internacional tan ben gañado fóra de Galicia".
Por Europa Press / Redacción | SANTIAGO DE COMPOSTELA | 01/12/2023 | Actualizada ás 14:50
A VII edición dos Premios Exceleite, convocados pola Consellería do Medio Rural, entregou os seus galardóns este venres a unha vintena de explotacións galegas de vacún lácteo, ás que se recoñece polo seu traballo e aposta pola calidade. Os distinguidos nas catro categorías (gandaría extensiva, semiextensiva, intensiva e ecolóxica) foron: Rubén Domínguez Estraviz, Granxas Costeiro, Tallón Lobato, Beatriz López Fernández, Gandaría Sinesi, Casa Menor, Gandaría Leumas, Gandaría Guerra-Gavieiro, Rosa Bardanca Fraga, Casa de Rita, Gandaría Casa Landeira de Oa, Gandaría Celoiras, Concepción García Pereira, Mariña Amado Aguiar, Carmen Barrán Santiso, Gandaría Revolta, Casa Martiño, Antonio Sufuentes Castro, Casa Codesal e Granxa Ecolóxica Figueroa.
Durante o acto, o presidente da Xunta, Alfonso Rueda, enxalzou o papel dos gandeiros galegos para "consolidar a Galicia como unha potencia láctea", un sector "crave" para a comunidade e un dos principais motores do rural. "Grazas a vós, o noso leite ten recoñecemento internacional tan ben gañado fóra de Galicia", afirma o titular do Executivo galego, quen recoñece a estes "magníficos embaixadores" da marca Galicia Calidade. "En moitos fogares cando se di leite, leva sempre de apelido galego", valora. Rueda subliña que Galicia é a comunidade na que máis creceu a produción de leite no últimos catro anos, cun total do 42 % do total de toda España. Así mesmo, avoga pola modernización e sustentabilidade para un produto de máxima calidade. Neste acto tamén participou o conselleiro do Medio Rural, José González.
