A mocidade de Santiago poderá decidir a que destinar 100.000 euros dos orzamentos do Concello
Será a través da proposta de participación 'Compostela Decide'.
Por Europa Press / Redacción | SANTIAGO DE COMPOSTELA | 04/12/2023 | Actualizada ás 14:39
Os mozos de entre 16 e 30 anos de Santiago de Compostela, empadroados, estudantes ou traballadores, poderán decidir a que destinar 100.000 euros dos orzamentos do Concello para 2024 a través da proposta de orzamentos participativos 'Compostela Decide'.
O proceso iníciase este luns e durante este mes de decembro, en xaneiro e en febreiro poderanse presentar propostas. Neste caso, calquera cidadán pode presentar iniciativas, sen límite de idade, a través do correo electrónico decide@santiagodecompostela.gal ou a través dun formulario no concello ou na web da iniciativa. O requisito é que se trate de propostas que impliquen á mocidade. Esta primeira fase desenvolverase ata o mes de febreiro. A partir de aí, o departamento de Xuventude valoraraas e a continuación abrirase o proceso de votación.
En canto ao proceso de votación, realizarase a través da web e cada persoa terá que votar tres propostas de forma obrigatoria. Segundo explicou este luns en rolda de prensa a concelleira de Xuventude, María Rozas, búscase un sistema "cooperativo" para que unha persoa non vote só a súa proposta, senón que haxa unha "visión conxunta". A máis valorada terá un peso de tres puntos, dous a seguinte e un punto a última, pero sempre votando tres candidaturas. Durante estes meses, o Concello organizará diferentes xornadas en institutos, facultades e outros espazos para explicar o proceso, e tamén realizará talleres de elaboración de propostas.
MÁXIMO 15.000 EUROS POR PROPOSTA
En concreto, destinaranse 100.000 euros --a executar en 2024-- a esta iniciativa, onde os mozos poderán elixir actividades, festivais, concertos, concursos, talleres, accións formativas ou campañas de sensibilización, entre outras cousas. Non existen requisitos, aínda que o tope máximo de orzamento por proposta será de 15.000 euros para tentar que o programa conte con "accións diversas" e sexa "máis completo".
Para Rozas, a participación é "un dos puntos craves e prioritarios" do Goberno local, polo que avanzou que están "a reactivar os consellos de participación" co obxectivo de "fomentar o papel activo da cidadanía na toma de decisións". Así mesmo, sinalou que é "especialmente relevante" a participación da mocidade e agradeceu a receptividade desta iniciativa por parte da comunidade educativa, así como as súas achegas. Ademais, lembrou que a experiencia desta iniciativa en edicións pasadas foi "moi positiva" e dela saíron propostas "moi interesantes" e que agora "forman parte da programación habitual".
