A alcaldesa de Santiago reunirase coa nova plataforma veciñal contra o ruído
Por E.P. | SANTIAGO DE COMPOSTELA | 04/12/2023 | Actualizada ás 15:30
A alcaldesa de Santiago, Goretti Sanmartín, afirmou, sen concretar data, que se reunirá coa nova plataforma veciñal que denuncia o ruído nocturno na capital galega. A preguntas dos medios este luns en rolda de prensa tras a xunta de goberno, a rexedora compostelá defendeu que xa mantiveron reunións con algunhas das asociacións que conforman esta plataforma, polo que asegura coñecer as súas reclamacións.
Con todo, sinalou que haberá diálogo con eles e defendeu que para o Goberno local é "unha prioridade" garantir o descanso dos veciños. Nesta liña, lembrou que xa se activou unha campaña de sensibilización ante o ruído que, insistiu, prodúcese "fóra dos locais". Ademais, sinalou que o Concello si toma medidas ante esta problemática e, ata o día 30 de novembro, a Policía Local tramitou 194 infraccións "por temas de ruídos na cidade".
DIÁLOGO
Sanmartín prometeu "todo o diálogo do mundo" e reivindicou que xa mantivo conversacións "de maneira informal" con persoas da plataforma, polo que coñece "perfectamente" que é o que solicita.
"Entendemos que hai que conxugar unha chea de cousas diferentes desde o punto de vista de sensibilización, normas, apoio, insonorización, pero tamén sabemos que a maior parte destes ruídos son no exterior dos locais", reiterou.
Así, aproveitou para facer un chamamento á poboación, porque veñen datas de lecer coa época do Nadal e débese "garantir o dereito ao descanso dos veciños". "Fago un chamamento a que todo o mundo, fóra dos locais, fale baixiño", resolveu.
