Galicia contará con 10 novos centros de capacitación dixital para maiores de 55 anos

O Ministerio de Educación, Formación Profesional e Deportes concedeu 3.549.780 euros para a creación de 146 novos centros de capacitación dixital en entidades locais, dos cales 10 están en Galicia, segundo informou o Departamento que dirixe Pilar Alegría. Con estas axudas, procedentes do compoñente 19 do Plan de Recuperación, Transformación e Resiliencia, a Rede Estatal de Centros de Capacitación Dixital ampliarase ata as 1.193 unidades. O Ministerio prevé que poida beneficiar a máis de 55.500 persoas maiores de 55 anos e con baixo nivel de formación.

Da decena que estarán situados en Galicia, oito serán na provincia de Pontevedra: en Cambados, Salvaterra de Miño, Tui, A Estrada, Tomiño, O Porriño, Poio e Vigo. Os outros dous estarán na provincia da Coruña: na cidade herculina e na Laracha. A iniciativa pretende formar á cidadanía en competencias dixitais transversais, ofrecendo oportunidades de formación con independencia do lugar de residencia.

Todo iso para que poidan levar a cabo comunicacións e transaccións seguras en liña, utilizando os seus propios dispositivos electrónicos, e para favorecer a alfabetización dixital como instrumento de novas oportunidades de formación e aprendizaxe. Estas axudas irán destinadas aos concellos para que poñan a disposición dos alumnos un espazo físico no que se impartan as sesións e garantan a mellora da cualificación e recualificación permanente, ademais de mentores e formadores.

O Ministerio prevé publicar unha nova convocatoria proximamente por valor de 8,9 millóns de euros para seguir impulsando esta rede. Esta liña de axudas destinada directamente ás entidades locais súmase aos 58,7 millóns de euros xa distribuídos polo Ministerio ás comunidades autónomas para a posta en marcha das primeiras 1.047 aulas.

A ministra Portavoz e de Educación, Formación Profesional e Deporte, Pilar Alegría | Fonte: Carlos Luján - Arquivo