A Xunta afirma que se retirou "o equivalente a 42 sacos" de pélets co operativo despregado

Ata o momento, o operativo despregado pola Xunta en relación á chegada de pélets plásticos retirou en costa "o equivalente a 42,2 sacos" destes elementos, que este xoves se detectaron en tres novas praias. Trátase da Mexilloeira e Areas das Pipas, no Grove e a Praia de Bornalle, en Muros, onde non constaba comunicación anterior da presenza de pélets. Así o dixo a conselleira de Medio Ambiente e vicepresidenta segunda da Xunta, Ángeles Vázquez, que este xoves presidiu a segunda reunión de seguimento do Plan Camgal. 

Nesta xornada, dixo Vázquez, traballaron na limpeza das praias galegas un total de 269 traballadores entre o persoal propio e o contratado pola Xunta. Estiveron a actuar en 40 areais de 30 concellos. No último operativo do que hai datos completos, o do mércores, recolleuse das praias o equivalente a 18 sacos de pélets por parte do dispositivo da Xunta, así como 695 quilos doutros plásticos que, neste último caso, irán ao colector amarelo para a súa reciclaxe. Ata o momento, o dispositivo da Xunta leva limpadas unhas 50 praias.

MEDIOS "AUGAS DENTRO" E LOCALIZACIÓN DO COLECTOR

Ademais dos medios postos pola Xunta en terra, Ángeles Vázquez mantivo na reunión a petición trasladada o mércores ao Goberno central de contar cos seus barcos, helicópteros e un submarino para a localización do colector.

O Goberno galego lembrou ao Executivo central dentro deste órgano "a importancia de chegar ata o fondo da cuestión", isto é, "saber que hai aínda nese colector" afundido e "como está". Para iso, o Goberno central trasladoulles que deben facer "unha comunicación ao Goberno portugués" e á Axencia Europea de Seguridade Marítima para poder "verificar" a súa posible localización, algo que "aínda non fixeron". "Nós reiterámoslle que ten que avanzar nese traballo porque é a súa obrigación. Nós estaremos ao seu lado", apostilou.

INTENSIFICAR A VIXILANCIA O FIN DE SEMANA

Outra das cuestións que se trataron neste encontro son as previsións meteorolóxicas para os próximos días e a necesidade de "intensificar a vixilancia" da chegada de pélets durante o fin de semana, tendo en conta a evolución das correntes mariñas. Segundo dixo Ángeles Vázquez, as previsións de cara aos próximos días indican que "pode propiciar a chegada de pélets" á costa, unhas condicións que están "en permanente análise" e "tamén serán públicas" a través da web do Camgal.

Tras o anticiclón deste xoves e venres, que protexe da chegada de material a costa, a partir do sábado espérase "a chegada dunha borrasca con ventos do sur" que son "favorables para empuxar pélets cara a terra". "Pélets que, sígoo dicindo, non sabemos se están ou non, se saíron do colector ou non saíron", dixo a vicepresidenta, que apostou por "chegar ao foco do problema", o colector perdido. A borrasca manterase ata o domingo, apuntou Vázquez, que lembrou aos voluntarios que acudan esas xornadas a limpar praias a necesidade de "precaución" precisamente polo mal estado do mar. O operativo da Xunta para eses días será de ata 300 persoas.

PLAN ANTICONTAMINACIÓN ENTRE GOBERNO E XUNTA 

A Xunta e o Goberno central rebaixaron as tensións e enfrontamentos públicos mantidos nos últimos días a raíz da vertedura dos pélets plásticos que chegan ás costas galegas tras a perda de seis colectores do cargueiro 'Toconao' o 8 de decembro. Así, achegaron posturas e constatado a súa "boa disposición" a ter unha "colaboración interdepartamental" neste asunto.

Confirmárono a vicepresidenta segunda da Xunta, Ángelez Vázquez, e o delegado do Goberno en Galicia, Pedro Blanco, durante as súas respectivas roldas de prensa --non compareceron conxuntamente-- celebradas tras a reunión do Plan Territorial de Continxencias por Contaminación Mariña Accidental de Galicia (Camgal), na que tamén participou o presidente da Federación Galega de Municipios e Provincias (Fegamp).