A Mesa denuncia os "incumprimentos" que sofre o galego por parte da Xunta e Goberno
Ante o comité de expertos da Carta Europea das Linguas do Consello de Europa.
Por Europa Press / Redacción | SANTIAGO DE COMPOSTELA | 17/01/2024 | Actualizada ás 19:47
A Mesa pola Normalización Lingüística denunciou ante o comité de expertos da Carta Europea das Linguas do Consello de Europa os "incumprimentos" que sofre o galego por parte da Xunta e do Goberno do Estado tanto en educación como en xustiza.
Nun comunicado, A Mesa explica que, no acto, ademais, participaron a Asociación de Medios en Galego (Amega), Prolingua, Axunta (Eo-Navia) e Fala Ceibe do Bierzo. Previamente, Amega e A Mesa mantiveron unha reunión con representantes políticos galegos no Parlamento español. A entidade sinala que o informe presentado ao Comité de avaliación da Carta Europea das Linguas incide no "incumprimento" da resolución previa emitida en 2019 polo Comité de Ministros europeo, que reclama á Xunta e ao Goberno español suprimir as limitacións á educación en galego en Galicia, emendar a Lei orgánica do poder xudicial para garantir o uso deste idioma a solicitude dunha das partes, mellorar o uso do galego na Administración do Estado e incluír o galego no Estatuto de Asturias.
No caso da educación, censura que "non só non se derrogou o decreto 79/2010 para eliminar as restricións ao uso do galego en materias como matemáticas, física e química e tecnoloxía, senón que o programa de libros de texto dixital EdixGal non permite que as materias que se poden impartir en galego conten con materiais para facelo. Ademais, apunta que a Xunta se negou reiteradamente a recibir a proposta da maioría de representación da comunidade educativa (sindicatos, ANPAS, MRPs) e A Mesa para elaborar un novo decreto.
Respecto da xustiza, critica a negativa do Estado a modificar a Lei orgánica do Poder Xudicial para permitir o uso do galego a petición dunha das partes, xunto á imposibilidade de empregar o galego no programa Minerva Nox que a Xunta traslada aos xulgados, o que obriga ao funcionariado a traducir formularios e documentos que si están en castelán e limita o uso do galego. Xunto a iso, A Mesa denuncia, tamén a existencia de directrices da Dirección xeral do Rexistro do Ministerio de Xustiza que impiden a tramitación normal da restauración dos apelidos do galego.
Respecto dos outros ámbitos que contempla a Carta, a Mesa trasladou ao Comité de expertos as dificultades para o uso do galego na Administración Xeral do Estado, que non require o coñecemento de galego para prestar servizos en Galicia ou que apenas conta con versións en galego nas súas webs a partir do primeiro nivel. A isto, indicou A Mesa, engádense os retrocesos na Administración autonómica, onde a oferta positiva en galego é cada vez menor, incluída a oferta en liña.
Neste sentido, lembrou ao Consello de Europa que máis do 60% das queixas que recibe a través da 'Liña do galego' teñen que ver coa administración pública, co SERGAS en primeiro lugar. En relación á vida social e económica, A Mesa denunciou o "incumprimento" na Carta na lexislación con "máis de 200 disposicións legais que obrigan ao uso do español". "Continúan sendo extremadamente difícil ou imposible abrir unha conta bancaria ou contratar un seguro en galego", sostén A Mesa.
En relación aos medios de comunicación, A Mesa lamenta a discriminación e arbitrariedade á que a Xunta somete aos medios en galego. "A exclusión do único xornal impreso en galego das axudas aos medios de comunicación serve para exemplificar unha actitude que se estende a dixitais e emisoras de radio e televisión", apunta.
