O gran debate electoral, Rueda colle todo o día para preparalo fronte a unha oposición que critica que se oculte

A Corporación Radio Televisión de Galicia (CRVTG) acolle este luns, día 5 de febreiro, o único debate electoral ao que o presidente da Xunta e candidato popular, Alfonso Rueda, confirmou a súa asistencia. Unha cita na que participarán a líder do BNG, Ana Pontón, o aspirante socialista á Xunta, José Ramón Gómez Besteiro, a candidata de Sumar de Galicia, Marta Lois, e a de Podemos, Isabel Faraldo. Vox quedou fora a pesar dos recursos presentados ante as xuntas electorais galega e central.

Será a partir das 21,30 horas e o candidato do PPdeG á reelección como presidente da Xunta, Alfonso Rueda, será o encargado tanto de abrir como de pechar unha cita política que virará ao redor de tres bloques.

O presidente da Xunta e candidato do PPdeG á reelección, Alfonso Rueda, liberará a súa axenda para poder preparar o debate. Rueda explicou que, á marxe das tarefas que teña que realizar como presidente da Xunta, está "obrigado por moitísimas razóns" a preparar un debate que desexaría que fose visto por "a maioría" de potenciais electores para escoitar as propostas de cada candidato ou candidata.

Confía en poder facer "balance" de como ve a Galicia actual, pero sobre todo pór sobre a mesa as propostas para o futuro. Con todo, manifestou o seu temor a que se converta en "un todos contra un" --en relación a que todos os representantes de partidos da esquerda se unan nun ataque común cara a el--.

Pola súa banda, a candidata do BNG á Presidencia da Xunta, Ana Pontón, volveu a instar este domingo a Rueda a "non esconderse" nos debates e a aceptar a celebración dun cara a cara contra ela. "Mañá imos ver que un debate é pouco para abordar os temas que preocupan a este país", sinalou para pedirlle a Rueda que "non se esconda" no debate que tamén organiza TVE e, en todo caso, que o PP non deixe a súa "cadeira baleira" porque "sería unha falta de respecto" á cidadanía que quere contraste de ideas e debate.

Tamén o candidato do PSdeG á Presidencia da Xunta, José Ramón Gómez Besteiro, alixeirou a súa axenda, sen actos públicos na tarde deste domingo, para preparar o debate. Asegurou estar "absolutamente centrado" no debate e esperando a que "o presidente ausente" decida tamén "comparece e render contas". "Nós o que imos ofrecer a Galicia nese debate é un futuro, un futuro mellor, a mellor versión de Galicia fronte ao legado nefasto dos 15 anos de goberno do PP", sostivo.

A candidata de Sumar á Presidencia da Xunta, Marta Lois, destacou a oportunidade que supón o debate da CRTVG para que a cidadanía galega escoite o programa de políticas útiles co que a súa formación se presenta aos comicios. "Estou preparada para gobernar. Teño experiencia e o 18 de febreiro abrirase un tempo novo, unha década nova para o noso país", sostivo.