'La Brecha', unha reportaxe multimedia sobre a separación da terra en Senegal polo avance do mar no norte do país

A Asociación Galega de Comunicación para o Cambio Social (Agareso) presenta este venres en Santiago de Compostela 'La Brecha', unha reportaxe multimedia que analiza o avance do mar no norte de Senegal. En xullo de 2023, Javier Ramos, Mar Navarro e Maréme Fall viaxaron a Saint Louis e Gandiol (Senegal) para profundar en todos os coñecementos adquiridos durante o XIII Seminario de Comunicación Social organizado por Agareso. Foi durante esta experiencia cando produciron 'La Brecha'.

En concreto, a reportaxe fai un percorrido por todas as eventualidades provocadas pola subida do nivel do mar na costa norte de Senegal, onde o cambio climático e a acción humana interveñen para agravar un dos grandes problemas que afecta a esta rexión: a erosión costeira.

A protagonista da peza é a "brecha" con varios quilómetros de lonxitude xerada na costa norte do país por unha intervención humana que agudizou problemas xa existentes de erosión costeira e salinización de terras, provocando deste xeito o desprazamento forzado de miles de persoas refuxiadas climáticas.

Así, a peza narra a historia de como persoas e poboacións enteiras víronse obrigadas a abandonar as súas casas, que foron devoradas polo mar. A presentación será este venres, ás 18.30 horas, na Casa do Taberneiro (rúa de San Pedro, 15, Santiago), correrá a cargo dos autores e do coordinador da iniciativa, Antonio Grunfeld, e concluirá cun coloquio.

Vista áerea do pobo de Gandiol | Fonte: AGARESO - Arquivo