Reaccións 18F.- Compostela Aberta lamenta a maioría do PP porque agardaban un cambio de goberno

O concelleiro de Mobilidade, Convivencia e Centros Socioculturais, Xan Duro, de Compostela Aberta, lamentou que o PP lograse unha nova maioría absoluta en Galicia. A preguntas dos medios este luns en rolda de prensa, Xan Duro lembrou que Compostela Aberta, "como forza municipalista", non tomou parte nestas eleccións autonómicas, pero recoñeceu que a súa "única aposta era que houbese cambio de goberno". "E é evidente que non o conseguimos", manifestou.

Sobre Sumar, candidatura que encabezaba Marta Lois, que fora a súa compañeira en Compostela Aberta, Duro sinalou que "no persoal" si lamenta que Lois "non vaia a estar no Parlamento". "Pero é un punto de vista persoal. Nós como organización lamentamos que este país non teña cambio de goberno", insistiu.

FELICITACIÓNS CABALLERO

Pola súa banda,  alcalde de Vigo e presidente da agrupación socialista local, Abel Caballero, trasladou este luns o seu "parabén" ao PP e a Alfonso Rueda pola súa vitoria nas eleccións autonómicas deste domingo, e fíxoo a través dunha concisa mensaxe na rede social X (antes Twitter).

O rexedor, que levou o peso da campaña electoral na cidade olívica, publicou un 'post' coa imaxe da bandeira e o escudo de Galicia, no que felicita a Rueda "pola súa vitoria electoral, contundente e inapelable". "A miña felicitación democrática e o meu desexo do mellor para Galicia", reza a mensaxe de Abel Caballero.