Pescadores critican o "total desprezo" da ministra Ribera ao sector coa aprobación inminente dos polígonos da eólica mariña

A Plataforma en Defensa da Pesca e dos Ecosistemas Mariños criticou o "total desprezo" da vicepresidenta terceira e ministra para a Transición Ecolóxica e o Reto Demográfico, Teresa Ribera, cara aos pescadores, ao rexeitar reunirse con eles tras dous anos da primeira petición. Nun comunicado, a asociación que representa a profesionais do mar de Canarias, Asturias e Galicia lamentou que o pasado 1 de febreiro enviou unha solicitude de encontro con Ribera que, a día de hoxe, aínda non foi respondida. O obxectivo do mesmo era abrir unha vía de diálogo tras a demanda que interpuxo a Plataforma ante o Tribunal Supremo en relación aos plans do Goberno central sobre a eólica mariña, explicando á ministra os motivos e as preocupacións dos pescadores sobre como pode afectar o sector.

"Queremos denunciar que a pesar de que despois de 2 anos desde a nosa primeira petición de reunión á ministra, e a pesar das manifestacións públicas de Teresa Rbeira tras a aprobación dos Plans de Ordenación do Espazo Marítimo (POEM), da súa vontade de reunirse co sector pesqueiro representado pola Plataforma, a día de hoxe nosa última petición do 1 de febreiro non recibiu ningún tipo de resposta, mentres se anuncia a inminente aprobación do marco regulatorio para a adxudicación de polígonos de eólica mariña en augas españolas, todo iso de costas totalmente aos pescadores afectados", criticou a entidade.

Así, lamentaron o "total desprezo" de Ribera cara ao sector pesqueiro, "mentres se pasea por diferentes congresos e encontros patrocinados polo lobi das industrias enerxéticas". "Négase a escoitar e informar os pescadores afectados os Plans de Ordenación do Espazo Mariño sobre a planificación en relación á implantación da eólica mariña nas nosas augas, a pesar da evidente afectación á actividade pesqueira e os ecosistemas mariños nas zonas proxectadas", engadiron. Por todo iso, a Plataforma pretende levar a cabo unha serie de protestas para que o Executivo "defenda e escoite" aos pescadores antes de empezar a poxar o territorio mariño "ao mellor ofertante".

O GOBERNO ASEGURA QUE O SECTOR ESTIVO PRESENTE "EN TODO O PROCESO"

Pola súa banda, o Goberno reivindicou que o sector pesqueiro estivo presente "en todo o proceso de elaboración" dos Plans de Ordenación do Espazo Marítimo (POEM), despois das críticas vertidas este venres pola Plataforma en Defensa da Pesca e dos Ecosistemas Mariños. En declaracións a Europa Press, a Delegación do Goberno en Galicia asegurou que o sector estivo presente "tanto de forma indirecta, nas reunións bilaterais en 2020 e nos grupos ad hoc en 2021, como de forma directa, no taller 'en liña' con pescadores en xullo de 2021". Ademais, puxo o foco en que "cada proxecto concreto, tanto de eólica mariña como de calquera outro sector estará sometido ao correspondente procedemento de autorización sustantiva e de avaliación de impacto ambientaL". "Só os proxectos ambientalmente viables sairán adiante", engadiron.