O Consello da Cultura Galega recompila os inicios do teatro profesional galego nunha serie documental

O Consello da Cultura Galega (CCG) recompilou os inicios do teatro profesional galego nunha serie documental co obxectivo de "preservar a memoria deste período", entre os anos 70 e 80. Para poder recompilar esa memoria, entrevistaron a 28 figuras, entre actores, dramaturgos, escenógrafos, activistas teatrais ou xestores culturais que trasladan os procesos de formación de grupos, dos debates e dos fitos dos primeiros anos do teatro galego contemporáneo.

Nunha nota de prensa, o Consello da Cultura Galega destacou que foi ao final do franquismo cando naceron ao longo de toda Galicia diferentes iniciativas ao redor das artes escénicas. Desde compañías afeccionadas, festivais ou xornadas de teatro, o que "acabou cristalizando no nacemento do teatro profesional".

Así, a coordinadora da Sección de Artes Escénicas, Musicais e Audiovisuais do Consello, Cristina Domínguez, explicou que o proxecto nace de "a necesidade de xerar recursos sobre o nacemento do teatro profesional, e era fundamental que os protagonistas puidesen dar a súa visión".

Pola súa banda, o vicepresidente da Academia Galega de Teatro, Eduardo Alonso, mostrou a súa preocupación polo feito de que "pasaban os anos e corríase o risco de quedar sen esas voces e esa memoria dos protagonistas". "A nosa obriga é deixar todo ben documentado para as próximas xeracións", manifestou.

DOUS EPISODIOS

A serie documental está composta por dous episodios. No primeiro, analízanse os inicios dos 70 a través dunha longa entrevista a Manuel Lourenzo, que se complementa con achegas de Xúlio Lago, Xerome Calero, María Xosé Porteiro, Eduardo Alonso, Luisa Merelas, Manuel Amenedo, Laura Ponche, Luma Gómez, Antonio Simón ou Cándido Pazó. O documental narra tamén o retorno dos profesionais galegos que estaban en Madrid traballando no teatro independente español.

O segundo dos documentais detense na Mostra de Teatro Galego de Ribadavia, promovida pola Asociación Cultural Abrente, que entre 1973 e 1980 "foi fundamental para vertebrar e crear un lugar de diálogo para todos os interesados no teatro".

Neste caso, participan os integrantes do 'Abrente de aquela', como Luisa Escudeiro, José Luís Chao, a tamén actriz Rosa Álvarez, Isolina Rionegro, e profesionais como Manuel Lourenzo, Xosé Manuel Rabón, Euloxio R. Ruibal, María Costas, Manuel Amenedo, Manuel Guede, Mabel Rivera ou Antonio Durán Morris, entre outros.

As pezas, que duran entre 40 e 45 minutos, están dirixidas por Perico Asorey, con Jairo Igrexas na edición audiovisual, baixo a coordinación da Sección de Música, Artes Escénicas e Audiovisuais do Consello da Cultura Galega. Durante este 2024 produciranse outras dúas pezas que informarán o proceso de institucionalización do teatro galego e sobre a presenza da muller nas artes escénicas.

Xunto a estes episodios concibidos para un público amplo, o CCG ten a disposición dos investigadores as entrevistas completas, que poden ser consultadas con fins de investigación. Os episodios poden verse aquí. 

A MIT, en Santo André de Camporredondo. | Fonte: MIT de Ribadavia