Comezan a demoler a fachada do edificio derrubado no barrio ferrolán de Esteiro
A derriba completa do inmoble, situado no número 37 da rúa Carlos III, é o paso previo á retirada do entullo, que durará dous días.
Por E.P. | Ferrol | 28/02/2024 | Actualizada ás 19:04
Unha empresa de demolicións arrincou na tarde deste mércores os traballos para derrubar por completo a fachada do edificio que colapsou o martes no barrio de Esteiro, en Ferrol.
Segundo informa o Concello, trátase dunha actuación urxente ante o risco de caída da fachada. Por iso, o goberno local contactou onte á noite cunha empresa especializada en demolicións, pero o custo destes traballos pagarao o propietario.
A derriba completa do inmoble, situado no número 37 da rúa Carlos III, é o paso previo á retirada do entullo, que durará dous días.
Antes do derrube na tarde do martes, un veciño do número 39 alertou tanto ao arquitecto do edificio que colapsou como á Policía Local ao decatarse dunha importante hendidura na parede que unía os dous inmobles e, posteriormente, ocorreu a caída.
Técnicos municipais analizarán agora se o número 39 tamén se viu afectado dalgunha maneira polo derrube do seu lindeiro. Mentres non se realice o informe, os inquilinos do mesmo non poderán regresar ás súas vivendas.
O Concello de Ferrol ofreceulles o martes unha alternativa para o seu realoxo temporal, que agradeceron pero declinaron, segundo informa o Consistorio.
