Tres acusados de enganar a un home por diñeiro aceptan unha condena dun ano de prisión

Dúas mulleres e un home acusados de urdir unha trama para facerse con máis de 130.000 euros dun home, ao que enganaron facéndolle crer que a súa vida corría perigo e que necesitaban fondos para a asistencia médica dunha persoa próxima, aceptaron unha condena dun ano de cárcere por un delito de estafa agravada.

Foi tras un acordo, no xuízo celebrado na sección primeira da Audiencia Provincial da Coruña, entre as defensas, as acusacións particulares e a fiscalía, que rebaixaron neste caso a súa petición inicial de condena. Ademais, aceptaron a suspensión da pena coa condición de non volver delinquir no prazo de dous anos e o pago do diñeiro en concepto de responsabilidade civil.

Segundo o escrito de cualificación fiscal, o tres persoas aproveitaron a confianza que a vítima tiña cunha delas, que lle prestou servizos sexuais en diversas ocasións, para facerse con distintas cantidades de diñeiro entre os anos 2015 e 2017.

Para iso, fixéronlle crer que pasaban por unha situación precaria e que tiñan que axudar a terceiras persoas por un problema de saúde grave, que requiría que viaxasen a Houston. Ademais, tamén lle dixeron que alguén quería matar a unha das procesadas e que necesitaban distintas cantidades de diñeiro para evitalo.

Así mesmo, fixéronse pasar en chamadas telefónicas por policía, xuíz e fiscal. A consecuencia destes feitos, o home realizou distintos ingresos bancarios e deulles cantidades de diñeiro en man, ata unha suma non inferior a 133.569 euros. A vítima denunciou os feitos en 2017. O Ministerio Público cualificaba, inicialmente, os feitos como constitutivos dun delito de estafa continuado, polo que pedía tres anos de prisión para cada un dos acusados, ademais de indemnización.

Audiencia Provincial da Coruña | Fonte: Arquivo