Nanotecnoloxía para loitar contra un dos cancros máis agresivos, o cerebral

Investigadores do Cimus da Universidade de Santiago de Compostela (USC) avanzan na detección temperá e no tratamento dun cancro cerebral letal, o gliobastoma -- un tumor que se orixina no cerebro, de rápido crecemento e agresividade, que afecta sobre todo as persoas maiores -- mediante a nanotecnoloxía. Trátase do tumor cerebral máis común e actualmente non ten cura.

Agora, o equipo dirixido por María José Alonso e Pablo Aguiar, avanzan na investigación desta enfermidade no marco da plataforma de micro-mecenado da USC Sumo Valor, que busca a participación cidadá para solicitar fondos a través de doazóns. A investigación intégrase no programa Diagbi da convocatoria de Proxectos de I+D+i en liñas estratéxicas en colaboración público-privada do Ministerio de Ciencia e Innovación.

Apuntan nun comunicado que na actualidade non existe tratamento para a enfermidade e a superviviencia media non supera os 14 meses desde o diagnóstico. "Isto débese a que a investigación focalizouse noutros tipos de cancro con maior prevalencia, como o de mama, próstata ou pulmón. No caso dos tumores cerebrais, a falta de investimento levou a que o prognóstico dos pacientes hoxe sexa similar ao que tiñan hai varias décadas", segundo explicou a investigadora principal do Cimus, María José Alonso.

Apuntan que a nanotecnoloxía supón "un enorme desafío" ao levar radiofármacos desde a súa inxección intravenosa ata o gliobastoma. "Aínda que, grazas ao anticorpo monoclonal, o radiofármaco debería unirse especificamente ao turmo, para que isto ocorra primeiro ten que chegar ata alí. A gran dificultade que presenta o proxecto e que pretendemos solucionar co desenvolvemento de nanopartículas que permitan ao radiofármaco atravesar as diferentes barreiras biolóxicas coas que se atopa. O maior desafío atoparao no cerebro, onde primeiro ten que superar a barreira hemato-encefálica e posteriormente no cerebro ata alcanzar as células tumorales", sostén Alonso.

TRABALLO DE CAMPO

A investigación ten unha primeira parte de desenvolvemento no laboratorio, na que se ensaiarán diferentes formulacións de nanopartículas e buscarase a solución óptima para atravesar a barreira hemato-encefálica. Ademais, realizaranse as probas de unión dos anticorpos aos isótopos radioactivos para formar o radiofármaco. A primeira fase debería ter como resultado varios prototipos de nanopartículas que sexan capaces de encapsular os radiofármacos.

A segunda parte do traballo, segundo explica o investigador principal do Cimus, Pablo Aguiar, "céntrase na validación in vivo dos prototipos". Para iso, traballarán con modelos animais de glioblastoma e con equipamento de imaxe de última xeración para comprobar a eficacia en termos de diagnóstico e tratamento. Os científicos confían en que os seus resultados mostren un aumento de supervivencia dos animais comparados cos tratamentos convencionais baseados en quimioterapia. A orientación traslacional dos experimentos permitirá xeral evidencia trasladable a un ensaio clínico.

Destacan que nesta liña de investigación podería supor un cambio de paradigma no tratamento de glioblastoma e outros cancros de difícil diangóstico e mellorar notablemente a calidade e esperanza de vida.