Lugo compite por ter o mellor monumento funerario de España

Lugo pode ser elixida a cidade co mellor monumento funerario de España. Trátase do mausoleo neogótico situado na entrada do cemiterio municipal de San Froilán que segue "liderando" un concurso con votación popular.

O goberno local informou de que este mércores -30 de setembro- finaliza a segunda fase deste concurso, que consiste nunha votación para que sexa a cidadanía a que elixa o mellor monumento funerario de entre os finalistas que superaron a primeira etapa do Concurso de Cemiterios de España, organizado pola revista 'Adios Cultural', financiada e editada por Funespaña.

O mausoleo neogótico que opta ao premio foi construído na segunda metade do século XIX e pasou a formar parte do patrimonio municipal en 2012, a través dunha cesión da familia de Armando Durán ao propio Concello.

Segundo o Concello, "presenta as características propias da arquitectura historicista, cunha marcada tendencia ao estilo neogótico e a súa construción atribúese a Cobreros, o arquitecto lucense que liderou a actividade construtiva da época marcando as liñas das novas tendencias arquitectónicas".

A votación continúa aberta até o xoves nas páxinas web www.lugo.gal e www.revistaadios.es.