O PSOE pide contas a Feijóo por contratar por 19 millóns coa empresa na que traballa o seu cuñado
Foi durante a súa época como presidente da Xunta.
Por Europa Press / Redacción | MADRID | 04/04/2024 | Actualizada ás 12:03
O PSOE volve pedir explicacións ao presidente nacional do PP, Alberto Núñez Feijóo, pola concesión de contratos desde a Xunta de Galicia á empresa na que traballa o seu cuñado por valor de 19,2 millóns de euros e a pesar de que a súa oferta era a máis cara de todas as que presentaron.
Fontes socialistas esixen explicacións a Feijóo por segundo día consecutivo despois de que o diario 'Público' publicase senllas informacións que apuntan a estas contratacións durante a pandemia, cando Feijóo era presidente da Xunta de Galicia.
En concreto, sinalan que do montante total recibido pola empresa, na que o cuñado de Feijóo, Ignacio Cárdenas, traballa como director comercial, 18,2 millóns de euros concedéronse mentres Feijóo era presidente autonómico. "A familia que licita unida, permanece unida", lanzan desde Ferraz.
Así, sinalan que esta empresa foi a máis beneficiada polas adxudicacións do fondo de continxencia do covid por parte da administración galega e remarcan que, segundo os novos contratos coñecidos este xoves, esta empresa gañou o concurso "coa oferta máis cara de todas as que se presentaron", apuntan.
Por tanto, os socialistas volven lanzar as mesmas preguntas a Feijóo para que aclare se Feijóo presidía o Consello de Goberno cando o servizo de saúde galego informaba sobre estes contratos e queren saber tamén se coñecía os contratos á empresa na que traballa o irmán da súa parella.
