O PP de Santiago pide ao BNG "entendemento" co novo goberno da Xunta liderado por Alfonso Rueda
O líder do PP de Santiago culpa ao executivo local compostelán de obstaculizar as propostas do Goberno galego.
Por Europa Press / Redacción | SANTIAGO DE COMPOSTELA | 16/04/2024 | Actualizada ás 17:21
O líder do PP de Santiago, Borja Verea, definiu coa palabra "futuro" o novo goberno da Xunta presidido por Alfonso Rueda e pediulle ao BNG, que lidera o executivo local compostelán, que dea paso ao "entendemento" con San Caetano. Para Verea, o recentemente nomeado executivo "é futuro pola importante renovación, con xente nova, con xente con enerxía e con novas ideas, pero tamén con ese equilibrio de persoas con experiencia que levan un tempo gobernando".
O tamén deputado popular sinalou, "en clave compostelá", que os retos "están aí pendentes" e "están paralizados por culpa do goberno do BNG", tales como son o aparcadoiro do Hospital Clínico ou o problema de vivenda na cidade e, en ambos os casos, as solucións "teñen que vir da man de dúas administracións".
No caso do aparcadoiro do CHUS, Verea lamentou que, "despois de propostas e contrapropostas; ceder, ceder e ceder por parte da administración autonómica en busca dunha solución, ata agora o único que houbo por parte do BNG foi non, non e non". Neste sentido, lembrou que "xa acabaron as eleccións autonómicas e non lles serviu de nada a estratexia de tentar rabuñar uns poucos votos para Pontón á conta dos intereses dos cidadáns de Santiago". "Tras nove meses de obstrucionismo cara á Xunta, agora desde o BNG parece que están dispostos a ceder e damos a benvida a ceder e negociar pensando en Santiago por fin", destacou.
"DEIXAR DE PARALIZAR ASUNTOS"
Sobre o problema da vivenda que sofre Compostela, o líder popular cualificou de "auténtico caos e confusión" a política exposta polo BNG, que "insiste en ir contra os propietarios, limitando a renda de aluguer ao mesmo tempo que propón vender a construtoras privadas todo o chan público que ten o concello en lugar de dedicalo a vivenda 100 por cen social".
Así as cousas, Borja Verea pediu ao goberno do BNG que "deixe de paralizar asuntos tan importantes para a cidade e vaia da man da Xunta para conseguir que Santiago avance".
