O PSdeG entrega os V Premios de Igualdade 'Maruja Vázquez' ás futbolistas Vero Boquete e Paula Dapena
Os premios de Igualdade do PSdeG foron creados en 2015 co obxectivo de recoñecer o traballo feito
Por Europa Press / Redacción | SANTIAGO DE COMPOSTELA | 17/04/2024 | Actualizada ás 17:55
O Partido Socialista de Galicia distinguirá co V Premios de Igualdade 'Maruja Vázquez' ás futbolistas Vero Boquete e Paula Dapena. O galardón recoñece a traxectoria e o compromiso social pola igualdade das premiadas.
O secretario xeral electo e portavoz parlamentario, José Ramón Gómez Besteiro, será o encargado de facer entrega dos galardóns no transcurso dun acto que se celebrará o sábado en Santiago de Compostela e no que tamén intervirá a secretaria de Igualdade do PSdeG, Silvia Fraga, como presidenta do xurado integrado por 12 mulleres que escolleron ás premiadas deste ano.
Diso informou o PSdeG nun comunicado, no que explica que os socialistas queren destacar o papel das dúas futbolistas galegas e a súa traxectoria persoal e profesional na defensa do feminismo e os valores do deporte.
Así, destacan o papel de Boquete como pioneira nun deporte que ata a chegada das deportistas da súa xeración era considerado netamente masculino, e a traxectoria deportiva e o activismo feminista de Dapena.
Os premios de Igualdade do PSdeG foron creados en 2015 co obxectivo de recoñecer o traballo feito, tanto por persoas individuais como por colectivos, en favor da igualdade entre mulleres e homes ou que permitan visibilizar as discriminacións por razón de sexos.
Despois dun período de suspensión, a celebración destas distincións retomouse en 2022 para chegar este ano na súa quita edición. Os galardóns de igualdade levan o nome de Maruja Vázquez Suárez (Santiago de Compostela, 1894 - Miño, 1936), mestra republicana e socialista asasinada polos franquistas no comezo da Guerra Civil.
Este pretende ser tamén un exercicio de recuperación da memoria dunha identidade crave no activismo feminista, que a ditadura franquista tentou borrar.
