O conselleiro de Sanidade fixa como un dos retos un "uso responsable e eficiente" da Intelixencia Artificial

O conselleiro de Sanidade, Antonio Gómez Caamaño, fixou como un dos retos do seu departamento un "uso responsable e eficiente" da Intelixencia Artificial.

Foi durante a súa intervención na apertura do XXXIX Seminario de profesores universitarios de Radioloxía e Medicina Física, sobre Intelixencia Artificial: aplicacións e impacto en docencia e investigación, acto no que estivo acompañado polo reitor da Universidade da Coruña, Ricardo Cao. Neste foro, o titular da carteira sanitaria do Executivo galego sostivo que as organizacións sanitarias levan tempo analizando os riscos e beneficios da Intelixencia Artificial.

Especialmente no campo do diagnóstico por imaxe, o conselleiro indicou que xa existen solucións de Intelixencia Artificial que están a permitir mellorar os diagnósticos, facilitando a toma de decisións clínicas. "O noso reto actual é conseguir un uso sistémico, responsable e eficiente en beneficio claro do paciente", apuntou.

O conselleiro de Sanidade, Antonio Gómez Caamaño, intervén nun congreso de radioloxía. MONCHO FONTES | Fonte: Europa Press