Galicia, quinta comunidade con máis mortes no traballo en 2023: infartos por "excesiva" presión, golpes e caídas
CC.OO. alerta dun aumento do 7 % da sinistralidade laboral en Galicia.
Por Europa Press / Redacción | SANTIAGO DE COMPOSTELA | 22/04/2024 | Actualizada ás 14:43
Comisiones Obreras (CC.OO.) alerta dun aumento do 7 % en 2023 da sinistralidade laboral en Galicia, quinta comunidade con maior número de falecidos, cun total de 50. Entre este medio centenar de persoas, destacan os 21 falecidos por infartos ou patoloxías non traumáticas. En rolda de prensa, o secretario de Saúde Laboral de CC.OO. de Galicia, Armando Iglesias, alertou tamén da deriva de mortes laborais no que vai de 2024, con 12 falecidos, oito dos cales se produciron na provincia de Pontevedra.
Considera esta situación "inadmisible" e chama a atención acerca de "patróns repetidos" que pasan por sinistros en empresas pequenas con poucos traballadores e sen sindicar, así como empregados con pouca experiencia. De tal forma, apela a atallar este "problema importante de fondo" mediante a formación en riscos laborais. Tamén esixe ás administracións que "poñan os medios e recursos para combater esta secuela", á vez que pide denunciar todas as situacións que se viven de incumprimentos.
CC.OO. apunta a factores detrás desta problemática como precariedade laboral e falta de recursos de inspección, cunha maior "contundencia" á hora de sancionar a empresas incumpridoras, de modo que os empresarios "entendan" que lles é máis rendible apostar pola formación que polas multas. Tamén dixo que están "preocupados" polos 21 traballadores falecidos por infartos, unha cuestión que identifica con "riscos psicosociais" e problemas de saúde mental, onde sinala cargas e ritmos "excesivos", así como presión importante.
ALZA DE SINISTRALIDADE
En detalle, Galicia rexistrou 30.423 accidentes de traballo con baixa en 2023, o que supón 2.021 máis (+ 7,11 %) que o ano anterior. Deste xeito, o índice de incidencia por cada 100.000 traballadores elévase un 5,14 %. Así, Galicia é a sexta comunidade con máis accidentes de traballo. A sinistralidade aumenta debido ao incremento dos accidentes leves, xa que baixan os graves e os falecidos (baixan de 67 a 50 mortes).
Os homes concentran o 71 % dos accidentes laborais (supoñen o 92 % dos mortais). O sector con maior incidencia de accidentes foi a construción (5,29 %), seguida de industria (4,81 %) e pesca (4,17 %). Tras as 21 mortes por infartos, o seguinte grupo con máis falecidos é por choques ou golpes (12 persoas mortas), seguido de atrapamentos e amputacións (sete mortes), así como caídas (sete mortes).
