Sumar prevé contar con estruturas organizativas en "todas as comarcas" de Galicia antes do mes de agosto
A través dunha "estrutura estable, sólida e con portavoces" en cada unha delas.
Por Europa Press / Redacción | SANTIAGO DE COMPOSTELA | 30/04/2024 | Actualizada ás 16:24
Sumar atópase inmerso no seu "proceso de constitución formal" en Galicia e, para ese efecto, prevé que antes do mes de agosto xa estea presente "en todas as comarcas" galegas a través dunha "estrutura estable, sólida e con portavoces" en cada unha delas. Así o avanzou o portavoz de Sumar Galicia, Paulo Carlos López, nunha rolda de prensa ofrecida este martes en Santiago xunto aos deputados da formación no Congreso pola Coruña e Pontevedra, Manuel Lago e Verónica Martínez Barbeiro, respectivamente.
A nivel orgánico, López lembrou que, tras as eleccións autonómicas celebradas o pasado 18 de febreiro --Sumar non obtivo representación--, presentou en marzo a súa primeira estrutura formal cun equipo directivo composto por 14 persoas, entre elas a que foi candidata nos comicios e exportavoz no Congreso, Marta Lois. Por iso, o portavoz de Sumar Galicia reivindica que están en proceso de "capilarizar e dar forma e corpo" ao proxecto político de Yolanda Díaz nesta Comunidade.
Os seguintes pasos serán que Sumar teña estruturas en "todas as comarcas" e a finais de ano celebrarase a primeira asemblea autonómica, na que se elixirán os órganos de dirección, redactaranse os seus documentos políticos e arrincaranse motores de face aos futuros retos electorais. "Sumar está aquí para quedar", proclamou López. E é que, polo momento, este partido está está constituído en cinco comarcas: A Coruña, Terras de Compostela, Pontevedra, Vigo e Ourense. As próximas, tal e como avanzou o portavoz, serán Lugo e Val Miñor.
MOBILIZACIÓNS DO 1 DE MAIO
Noutra orde de cousas, Paulo Carlos López fixo un chamamento á participación "masiva" da sociedade nas mobilizacións que convocan os sindicatos para este mércores, 1 de maio, Día Internacional dos Traballadores. Este ano, será "en defensa da democracia". Sumar Galicia estará presente con comitivas propias nas mobilizacións de CCOO, UXT e CIG.
