Máis de 50 actividades para celebrar o Día Internacional dos Museos

A Xunta programou este ano máis de medio centenar de actividades nos espazos museísticos que xestiona para conmemorar o Día Internacional dos Museos, que se celebra o sábado 18. O Consello Internacional de Museos propón para celebralo o lema 'Museos pola educación e a investigación' ao que a programación da Consellería de Cultura, Lingua e Xuventude súmase con visitas guiadas, talleres, xornadas de portas abertas, actividades didácticas, teatro e música, entre outras propostas dirixidas a todos os públicos.

Tal e como informou a Xunta, a pesar de que haberá actividades ao longo da semana que vén, o epicentro da programación desenvolverase durante a fin de semana dos días 18 e 19 de maio. A axenda pode consultarse nas respectivas webs e redes sociais dos centros de todo o territorio galego.

DESPEDIDA DE 'HÁBITATS'

Por outra banda, a instalación inmersiva 'Hábitats. Natureza estendida' pechará as súas portas na Cidade da Cultura o próximo 19 de maio. Preto de 10.000 persoas de todas as idades achegáronse a explorar coas lentes de realidade virtual os diferentes ecosistemas, animais e plantas desta aventura dixital que esgotou as entradas dispoñibles xa o pasado mes de marzo. O conselleiro de Cultura, Lingua e Xuventude, José López Campos, subliñou a excelente acollida desta mostra, pioneira en Galicia tanto polo emprego da tecnoloxía como pola súa concepción desde a sustentabilidade e os valores de cultura inclusiva.

"É por iso que na Cidade da Cultura traballan xa en novas experiencias dixitais que o público poderá gozar en 2025", avanzou durante unha visita á instalación no Museo Centro Gaiás. Trátase dunha liña de actuación que busca ampliar a oferta de contidos culturais vinculados ás novas tecnoloxías, e que impulsará tamén o futuro Centro de Artes Dixitais de Galicia en construción no Gaiás.

Dirixida polo artista visual Carlos Seijo, 'Hábitats. Natureza estendida' combina arte e tecnoloxía ao servizo dun relato que promove o descubrimento da biodiversidade e a responsabilidade á hora de relacionarnos co medio ambiente. Un dos seus maiores atractivos é poder interactuar de maneira directa cos animais e plantas virtuais que poboan o Museo Centro Gaiás, como baleas, elefantes, acacias, focas ou tartarugas, entre outras moitas.

O conselleiro de Cultura, Educación, FP e Universidades en funcións, Román Rodríguez, probando a experiencia 'Galiverso dous Museos'.. XOÁN CRESPO