O BNG preguntará no Congreso polo "novo atraso" no estudo do baipás ferroviario de Betanzos
Despois de que se concedera outro prazo de tres meses para modificar o proxecto.
Por Europa Press / Redacción | SANTIAGO DE COMPOSTELA | 13/05/2024 | Actualizada ás 20:12
O deputado do BNG no Congreso, Néstor Rego, rexistrou iniciativas para que o Goberno central explique os motivos do "novo atraso", neste caso de tres meses, no estudo do baipás ferroviario de Betanzos, despois de que se concedera outro prazo de tres meses para modificar o proxecto.
O pasado mes de febreiro, o Ministerio de Transportes e Mobilidade Sustentable confirmaba que o estudo deste proxecto entraba na súa fase de planificación final tras cinco anos de desenvolvemento, pero agora anunciouse esta modificación "por axustes normativos" e para "revisar os datos de rendibilidade socioeconómica e a data actual".
Neste contexto, o deputado do BNG lamenta que este proxecto "que leva en tramitación durante cinco anos" non se adaptase xa á normativa vixente, polo que o Goberno "debe explicar por que sofre un novo atraso", cando contaba cun prazo de execución inicial de dous anos. En definitiva, Rego cre que o Ministerio debe garantir que este límite de tres meses "non vaia a ser novamente atrasado ou aprazado". Por iso, preguntará polo calendario que manexa para que finalice o estudo e a posterior adxudicación e execución das obras.
