Galicia rexistrou 236 desaparicións de menores en 2023
A maior parte das desaparicións son voluntarias e motivadas por rifas familiares ou por perderse en zonas de gran concentración de persoas.
Por Galicia Confidencial | Compostela | 25/05/2024 | Actualizada ás 13:00
As desaparicións de persoas é un problema que vai en aumento. En España rexistráronse un total de 24.581 denuncias por desaparicións en 2023; que corresponden a 15.126 persoas en paradoiro descoñecido (no 70,93% dos casos os ausentados non eran reincidentes), atendendo os datos do Centro Nacional de Desaparecidos (CNDES) analizados pola compañía española SaveFamily.
Estas cifras tórnanse máis preocupantes ao analizar o seu impacto nos nenos desaparecidos no conxunto do Estado: o ano pasado rexistráronse 7.391 menores desaparecidos (un 48,9% do total de desaparecidos), deles, 236 de Galicia. Entre os motivos que causaron este problema destaca que 6.714 menores afastáronse dos seus fogares de forma voluntaria, 140 nenos desapareceron involuntariamente e 72 foron subtraídos de maneira forzada.
En relación cos menores desaparecidos a nivel provincial, encabezan a lista Madrid, con 1.003 desaparecidos, As Palmas con 735 e Barcelona, con 539 menores ausentados sobre o total a nivel estatal. Na outra cara da moeda destacan Teruel (8) e Soria (11), como as provincias máis seguras de España nesta categoría. Analizando o conxunto das comunidades, Andalucía resalta como a zona máis afectada ao sumar 1.326 nenos desaparecidos, seguida de preto por Canarias (1.030).
No caso galego son 236 os menores desaparecidos sendo a provincia de Pontevedra a máis afectada con 94 desaparicións. A Coruña tivo 74 denuncias por desaparición de nenos e nenas, mentres que en Ourense houbo 53 e en Lugo, 15.
MOZOS ENTRE 13 E 17 ANOS
Os casos máis comúns danse entre mozos de 13 a 17 anos, que corresponden a un 95,12% do total de menores desaparecidos (7.030 adolescentes no ano 2023), que, na maior parte dos casos, estes abandonaron os seus fogares de forma voluntaria. Doutra banda, no ano anterior, foron 361 os menores de 12 anos que desapareceron no noso país, un 4,88% do total. Xeralmente, os menores abandonan o seu fogar tras unha discusión familiar ou para ir cos seus amigos, sen o previo consentimento dos seus proxenitores. Debemos destacar tamén que estes se resolven, de media, durante o tres primeiros días de procura.
A preocupación dos pais por coidar dos seus fillos creceu nos últimos anos e apoiáronse na tecnoloxía para buscar solucións. Sen ir máis lonxe, a demanda de dispositivos de xeolocalización destinados a menores creceu un 83% desde o final do confinamento. Os expertos en seguridade de SaveFamily sinalan a desaparición de forma involuntaria dun menor como a causalidade "máis común" en lugares grandes e moi concorridos como centros comerciais, praias ou feiras, ou ao non saber como volver a casa e destacan a importancia de manter vixiados aos nenos.
