Adolfo Domínguez Fernández seguirá no consello de administración do seu grupo textil
Foi reelixido como conselleiro dominical polo prazo estatuario de catro anos.
Por Europa Press / Redacción | Santiago de Compostela | 30/05/2024 | Actualizada ás 15:39
A xunta xeral ordinaria de accionistas de Adolfo Domínguez, que se celebrou este xoves na súa sede en San Cibrao das Viñas, ratificou a renovación de Adolfo Domínguez Fernández, fundador e principal accionista, como membro do consello de administración, segundo informou este xoves a compañía á Comisión Nacional do Mercado de Valores.
En concreto, Adolfo Domínguez Fernández foi reelixido como conselleiro dominical polo prazo estatuario de catro anos. O consello de administración da firma de autor deu 'luz verde' á reelección de Mazars Auditores como auditor de contas de Adolfo Domínguez, así como do seu grupo consolidado para o exercicio iniciado o pasado 1 de marzo de 2024 e que finalizará o 28 de febreiro de 2025. Tamén abordou o importe máximo da remuneración anual a satisfacer aos conselleiros.
Así mesmo, os accionistas apoiaron a xestión e contas do grupo de moda no exercicio 2023-24, no que Adolfo Domínguez xerou unha facturación de 126,7 millóns de euros, un 10,9 % máis que no ano anterior. Pola súa banda, a presidenta executiva da firma de moda de autor, Adriana Domínguez, lembrou na xunta que as vendas 'en liña' do grupo Adolfo Domínguez creceron un 21,9 % no exercicio 2023/24 (entre marzo de 2023 e febreiro de 2024), alcanzando máximos históricos.
Ademais, o conselleiro delegado de Adolfo Domínguez, Antonio Puente, detallou ante os accionistas as claves que permitiron á firma encadear beneficio neto positivo por segundo ano consecutivo. "O 2023-24 foi un exercicio marcado polo aumento de vendas e a consolidación da nosa recuperación, á vez que transformamos a compañía para seguir impulsando o crecemento. Sempre coa moda de autor, sustentabilidade, innovación no centro de todo o que facemos", destacou o conselleiro delegado.
