Preparando as eleccións

E é que na batalla electoral os números contan, e moito. Tanto socialistas como nacionalistas comezan a ver datos preocupantes, tanto no eido económico coma electoral. Aínda que a reedición do bipartito non corre perigo, si se detecta un estancamento do apoio a PSOE e Bloque e un lixeiro repunte do PP con respecto a enquisas semellantes de hai un ano.

Non está en xogo, polo menos de momento e niso son coincidentes todas as sondaxes, a estabilidade do bipartito a pesar da dureza da crise económica. Sen embargo, o empeoramento da situación económica e os efectos no emprego poden pasar factura aos partidos no poder. Por iso, no PSOE xa lle advertiron a Touriño que non retrase máis do previsto a convocatoria electoral porque lle pasaría factura.

No minicumio celebrado o luns, Blanco deixou claro que os procesos electorais de Galicia e Euskadi son básicos para manter a fortaleza do PSOE a nivel estatal. Por iso, anunciou que o aparato de Ferraz vaise volcar nestas dúas convocatorias; na galega para que Touriño conserve o poder e na basca para que Pachi López sexa o próximo lehendakari. E para acadar estes obxectivos non valen máis retrasos electorais. Neste esquema, as eleccións en Galicia serán antes que as de Euskadi, pero os dous procesos case que van correr en paralelo.