O Partido da Terra tamén se presentará ás xerais
Acada máis de 3.000 avais que posibilitan que poida presentar candidaturas aos comicios do 20D. Será o único que vaia en solitario e cun programa que ataca á “política profesional” e aposta porque todos os cidadáns sexan “suxeitos políticos”.
Por Galicia Confidencial | Lousame | 18/11/2015 | Actualizada ás 11:00
O Partido da Terra presentarase, finalmente, aos comicios galegos. Será a única formación da esquerda que se presenta mantendo o seu nome, sen formar parte de ningunha coalición, e coa necesidade de que sexan as persoas as que decidan e non as cúpulas.
Finalmente foron máis de 3.000 persoas en toda Galicia as que deron o seu apoio en forma de avais á participación do Partido da Terra nas eleccións xerais de decembro, con candidaturas ao Congreso e ao Senado en todas as circunscricións galegas. Superouse, así, a obrigación de reunir avais do 0,1% das persoas electoras inscritas en cada circunscrición, á que non están suxeitas as candidaturas que inclúen partidos que xa contan con deputadas electas.
As candidaturas foron presentadas este luns e, por primeira vez, destaca esta formación “resultaron dun proceso de elección por sortes, considerada historicamente a principal característica da democracia”. “Frente a política profissional, numa comunidade democrática, todas as pessoas devem ter a condição de sujeitos políticos plenos, sendo as quendas aleatórias e rotativas um instrumento fundamental, desde a ecclesia ateniense até os concelhos abertos paroquiais galegos”, indica nun comunicado.
Deste xeito, o PT di que confrontará o bloque monolítico de políticos “profesionais, estatistas, parlamentaristas e desenvolvimentistas” que disputan, di, “a concesión administrativa de decidir por nós durante os próximos catro anos”. A súa será “unha alternativa à política profissional centrada no autogoverno das pequenas comunidades”.
O Partido da Terra foi fundado en xullo de 2011 como movemento de transición para o autogoberno asembleario en concello aberto e para a autosuficiencia comunitaria. Desde o inicio, a súas accións foron sempre encamiñadas a provocar unha transformación radical e necesaria do concepto “política”, a través da reivindicación da democracia directa asemblearia e a construción de institucións alternativas ás do estado. O seu obxectivo é “desenvolver a auto-organização cidadá e reclamar o direito a decidir tudo”.
