Comeza o xuízo contra Rojadirecta na Coruña
A web realizada en Galicia con máis visitas non é da Xunta, a de Zara ou a dun medio de comunicación. É Rojadirecta, o portal especializado en enlaces que permiten seguir en directo eventos deportivos e descargar os partidos. En 2011, cando o goberno dos Estados Unidos bloqueou o acceso a varios dos seus dominios, o portal declaraba máis dun millón de visitas únicas diarias. Rojadirecta gañou aquel preito e continou a operar legalmente.
Por Galicia Confidencial | A Coruña | 18/11/2015 | Actualizada ás 15:00
Hoxe comezou a vista oral dun novo preito, promovido por Media Pro e a LFP. Fíxoo na Coruña, no Xulgado do Mercantil número 2, tras trasladarse o caso dende Madrid. Esta era unhas das reivindicacións de Igor Seoane, o administrador da web, pois a empresa editora está baseada en Arteixo, polo que non entendía porque o procesaban en Madrid.
O letrado de Seoane ofreceu depositar unha caución de 10.000 euros no xulgados para facer fronte aos posíbeis perxuízos. Os letrados de Mediapro e Gol TV reclamáronlle ao xuíz que non aceptase depósito algún e que, de facelo, debería fixar unha cantidade de polo menos 50 millóns de euros.
Tal diferencia mostra até que punto son diferentes a visión das partes da actividade do portal. Seoane argumenta que el só proporciona enlaces e que en Rojadirecta non hai publicidade. As empresas audiovisuais cren que os enlaces violan os seus dereitos de propiedade intelectual e que Seoane obtén beneficio económico dalgún xeito.
Mediapro e Gol TV denuncian tamén que Rojadirecta segue a funcionar, incumprindo na súa opinión as medidas cautelares impostas; mentres o letrado da defensa cre que estas medidas cautelares deberían ser substituídas por unha caución de 10.000 euros.
