A Xunta aproba unha lei urxente para que se constrúa a planta de Citröen en Vigo

Citröen poderá, finalmente, contar coa súa nova planta para a construción do seu modelo de furgoneta K9, a pesar da resolución do Tribunal Supremo (TC) que suprimiu o Plan Xeral de Ordenamento Municipal (PXOM) de Vigo e que impedía a execución desta infraestrutura, da cidade da xustiza ou da estación intermodal. E é que o Goberno galego deu xa luz verde á Lei de medidas para proxectos de especial urxencia ou interese público que permitirá "desbloquear" a situación urbanística desta cidade.

A nova lei de urxencia será levada ao vindeiro pleno e contará, con toda probabilidade, co apoio do PPdeG e o PSdeG. A normativa tamén servirá para calquera concello que poida estar nunha situación semellante e necesite impulsar proxectos promovidos por institucións públicas.

“Esta nova lei servirá para resolver o problema de Vigo e blindará a outros concellos ante o decaemento do seu PXOM ou porque este non se poida executar de forma inmediata”, dixo o presidente da Xunta na rolda de prensa posterior ao Consello da Xunta.

Así, defendeu que se trata dunha “solución legal” e dun “proceso rigoroso”. “É unha solución que respecta a autonomía local, mantén a esixencia de todos os informes sectoriais requiridos, incluído o de impacto ambiental, e respecta as resolucións xudiciais", suliñou.

Neste sentido, precisou que mantén a autonomía municipal porque para que poida ser activada a lei precisa dun informe vinculante dos concellos. “Se é rexeitado, os proxectos arquivaranse”, apuntou. Tamén suliñou que serán necesarios proxectos informados sectorialmente, especialmente, aqueles que teñen que ver co impacto de avaliación ambiental e destacou que respecta as resolucións xudicias, en relación á anulación do PXOM vigués por parte do TS.

“Este mecanismo non busca evitar as resolucións xudiciais, senón o contrario, xa que para que esta vía se poida utilizar, o Concello debe iniciar o procedemento para un novo plan de ordenación municipal. Son medidas garantistas para ser útiles ao país", incidiu.

Resolver a situación urbanística en Vigo

Precisamente, esta lei servirá para desbloquear por completo os principais proxectos urbanísticos de Vigo e, especialmente, o da nova planta de Citroën. E o presidente da Xunta non negou que a súa finalidade teña que ver coa petición feita pola multinacional francesa. Así explicou que, neste caso, terá que ser a Zona Franca de Vigo a que solicite a Consellería de Medio Ambiente e Urbanismo a activación desta nova lei.

A Xunta terá que xustificalo en razóns de urxencia e especial interese, “e neste caso esa urxencia ven dada pola paralización da construción de dous millóns de furgonetas e da candidatura da factoría viguesa á construción doutro modelo”, apuntou Feijóo.  Despois a consellería pasaralle o expediente ao Concello que ten dez días para recorrelo ou aprobalo en pleno. Unha vez aprobado volverá á Consellería de Medio Ambiente que, unha vez, dado o visto bo e avaliados todos os informes, remitirallo á Concellería de Economía, que será quen o leve ao Consello da Xunta para a súa aprobación.

En total, Feijóo estima que a situación urbanística de Vigo pode estar solucionada entre catro e seis meses. Unha situación que permitirá, ademais, desbloquear a construción da estación intermodal e da cidade da xustiza.