Por Galicia Confidencial | A Coruña | 28/02/2016 | Actualizada ás 15:05
Actualización das 15 horas
O documento político que acaba de aprobar a maioría da militancia aposta por a "conformación dunha amplia candidatura nacionalista nas próximas autonómicas" pero non prevé compartir cartel con forzas de ámbito estatal, o que na práctica afasta ao Bloque da fórmula das mareas. Tampouco recolle que no Bloque a militancia sexa individual e non a través doutros partidos, como pedían entre outros o actual líder Xavier Vence.
Como se agardaba, a derrota dos críticos foi total. As catro emendas a totalidade presentadas e os votos particulares enunciados por eles foron rexeitados. Finalmente non se puido defender unha única emenda común do sector non oficialista, que pactaran entre eles hoxe.
A militancia aprobou o informe de xestión con 1095 a favor 84 en contra e 235 abstencións. Unha confirmación da liña seguida até hoxe que apunta a que a candidata oficialista, Ana Pontón, será elixida este serán nova voceira nacional. Tamén unha indicación de que os críticos coa liña do UPG e o MGS son hoxe unha pequena maioría no Bloque. Agora tócalles escoller entre o camiño de Aymerich, que confimou o seu abandono, ou o de Carme Adán ou Tareixa Paz, que tamén defenderon un cambio de rumbo pero que indicaron que continuarán no Bloque.
Actualización das 14 horas
“Temos que facer alianzas. A cidadanía que quere mudanza entendeu que a fragmentación era unha trampa mortal e decidiu voto útil para tentar gañar a partida. Temos que escoitala!!” Así de clara foi a defensa que Xavier Vence fixo dun posíbel pacto coas forzas que colaboran en En Marea.
O voceiro nacional saínte do Bloque pronunciou un discurso que se distancia das teses impulsadas pola UPG, o partido máis numeroso na fronte, e aprobadas pola maioría militancia nas asembleas comarcais.
Ademais de abrir a porta a negociar con ANOVA, Podemos, as mareas e Esquerda Unida; Vence defendeu que o BNG abandone o modelo frontista. O profesor da USC animou a máis de 1.500 persoas que enchen o Palexco de Coruña a “retecer” o Bloque nunha “única sigla, cunha única lealdade e unha única dirección”. Proposta que na práctica suporía disolver a partidos de ideoloxía comunista como a UPG ou o seu aliado Movemento Galego ao Socialismo e que, salvo gran sorpresa, non sairá adiante.
Vence non se sumou ao texto pactado entre os diferentes sectores críticos, pero coincide en varios dos seus postulados. As deputadas Carme Adán e Tareixa Paz, a profesora Alba Nogueira e Abrente (a corrente máis próxima a socialdemocracia cuxo primeiro referente público é Carlos Aymerich) pactaron a última hora un texto común para sometelo a asemblea. Ademais de adscrición individual, queren buscar “a unificación con outras forzas que operan no mesmo espazo político" e que unha xestora comece xa a negociar con outros partidos e colectivos un marco común para “construír unha nova organización política unitaria e democrática para o nacionalismo".
Unha profunda “refundación” que vai máis alá do planeado pola UPG co apoio do MGS. As teses oficiais defenden actualizar o discurso e a organización, pero non contemplan pór fin aos partidos que participan no Bloque e moito menos abrirse a pactos con forzas de ámbito estatal. “Diluírmonos en espazos que dirixe e capitaliza quen quer salvar España non é futuro nin vitoria”, argumentou un dos representantes do MGS. Dende a UPG, Rubén Cela argumentou que "o centralismo é centralismo non importa o envoltorio" e que non se pode ser “soberanista a tempo parcial”.
Cunha hora, aproximadamente, de atraso sobre o horario previsto está a piques de rematar a defensa pública das emendas a totalidade. Posteriormente serán as votacións, primeiro a totalidade e logo a das emendas parciais.
Cara as 20 horas pronunciará o seu discurso o gañador das votacións á nova Executiva. Salvo cambio maiúsucla de última hora, Ana Pontón -militante da UPG- pronunciará o seu discurso como nova voceira nacional do BNG, a primeira muller que ocupa este cargo. A súa lista integra a militantes do seu partido e do MGS, pero non dos sectores críticos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.