Galegos que loitan por vivendas dignas en Guatemala
Arquitectura Sen Fronteiras e AGARESO presentan "El derecho a un techito', un documental que recolle o traballo de voluntarios galegos durante oito anos para que comunidades indíxenas teñan unha vivenda digna.
Por Galicia Confidencial | A Coruña | 28/03/2016 | Actualizada ás 19:23
En vinte días Raúl e a súa familia durmirán baixo un teito por onde non pasa a choiva. Nin o medo. Un teito que protexerá a Raúl e aos seus fillos por primeira vez na súa vida da violencia, da enfermade, e da inxustiza que sofren os máis pobres de Guatemala.
Este é o argumento do documental que mostra o traballo que Arquitectura Sen Fronteiras (ASF) desenvolveu en Guatemala nos últimos oito anos sobre o dereito a unha vivenda digna. Neste país, máis dun millón e medio de familias non teñen acceso a unha vivenda adecuada e saudable. Por iso, esta ONG traballa da man das súas contrapartes ASIAPRODI e FODHAP para promover, baixo a filosofía da produción social de vivenda, o dereito a un fogar digno para as persoas máis empobrecidas.
A Declaración Universal dos Dereitos Humanos di que todas as persoas teñen dereito a unha vivenda digna, a un fogar. En Guatemala ou en Galicia. A idea subxacente é que todo o mundo necesita un espazo para vivir e desenvolverse integralmente.
Por iso, o pasado mes de novembro tres voluntarios da ONGD AGARESO (Asociación Galega de Reporteiros Solidarios) desprazáronse até a costa sur de Guatemala, onde opera ASF, para rodar o documental "El derecho a un techito" que centra a súa atención no traballo de ASF e os seus socios no país e no porqué desta situación, contextualizando unha realidade complexa, e apoiando a idea da vivenda non como unha mercadoría, se non como un dereito.
Guatemala ostenta a dubidosa honra de ser un dos países máis desiguais do mundo, cunha taxa de persoas sufrindo pobreza do 53.7%, (INE, 2013). "Non é de estrañar por tanto que case a metade da poboación do país viva en infravivendas de autoconstrucción que non cumpren cunhas condicións hixiénicas e de seguridade mínimas", indica AGARESO nun comunicado. Unha situación que afecta directamente á súa saúde, e tamén os fai vulnerables ante as inclemencias meteorolóxicas, os terremotos, os incendios ou a violencia.
A peza, de 25 min, estrearase o xoves 31 de marzo ás 20h na Fundación Luís Seoane da Coruña. Tras a proxección terá lugar un coloquio cos membros de AGARESO e ASF implicados no desenvolvemento do documental. Tamén participarán a través de videoconferencia os socios de ASF desde Guatemala.
