Identificadas catro persoas por roubar presuntamente baterías de embarcacións en Betanzos

A Policía Local do municipio coruñés de Betanzos identificou a catro veciños da localidade aos que se lles imputan varios presuntos delitos contra a seguridade do tráfico, ao conducir de forma temeraria, outro delito de utilización ilexítima de vehículo a motor e un terceiro de roubo con forza, por subtraer baterías de embarcacións.

Segundo informa, os feitos ocorreron o pasado día 14 deste mes sobre as 23.15 horas cando a Policía Local recibiu unha chamada telefónica dun veciño indicando que varios mozos camiñaban pola praza Enrique IV portando diversas baterías de embarcacións.

Os efectivos localizan aos individuos circulando nun vehículo que carecía de seguro obrigatorio e de ITV desde facía 15 anos, tempo no que falecera o seu propietario.

O condutor, ao observar a presenza da Policía Local, acelera bruscamente e dáse á fuga, a pesar dos sinais luminosos dos axentes que lle ordenaban deterse. Posteriormente, "a gran velocidade" golpea un turismo, circula por encima da beirarrúa e en dirección prohibida, "con perigo para condutores e peóns cos que se vai atopando".

Cando a patrulla consegue interceptalos certifica que os ocupantes, todos eles veciños de Betanzos, son "coñecidos da Policía Local". No maleteiro localizan seis baterías que presuntamente subtraeron.

En concreto, ao condutor impútanselle presuntos delitos contra a seguridade do tráfico ao conducir de forma temeraria, outro de utilización ilexítima de vehículo a motor e un terceiro de roubo con forza. Aos outros tres ocupantes impútaselles un delito de roubo con forza.

A Garda Civil de Betanzos continúa as indagacións por se puidesen estar implicados noutros delitos tanto en Betanzos como noutras localidades da comarca.

Concello de Betanzos | Fonte: Arquivo