Por Galicia Confidencial | Compostela | 13/04/2016 | Actualizada ás 13:38
Os estudantes tomaron distintas localidades galegas para protestar contra as reformas educativas do Goberno do PP tanto no ensino medio como no ensino universitario e pediron ás administracións que defendan o ensino e a construción dun futuro.
Con consignas contra a recuperación do sistema de reválidas, a LOMCE, a implantación do 3+2 en estudos universitarios ou as trabas que o texto impón ás carreiras de Humanidades, pola súa escasa eficiencia económica, marcharon por distintas urbes e concellos galegos.
"A vixencia das leis promovidas polo PP en materia educativa como son o 3+2 e a LOMCE son o motivo desta convocatoria", denuncia o colectivo estudantil Erguer, contrario a estas normas "antidemocráticas" e partidario dun ensino "de calidade".
Esta organización estudantil denunciou que son os estudantes os que "padecen en primeira persoa a precariedade á que os recortes levan a educación".
En Santiago foron centos os estudantes que participaron na manifestación, que como no resto de cidades, comezaron en torno ao medidía. Nestas protestas tamén particparon dirixentes do BNG e de Anova, entre outros.
Na Coruña, medio milleiro de estudantes, segundo a Policía local, participaron tamén na manifestación convocada pola organización estudantil Erguer, que transcorreu con normalidade desde o seu inicio na Praza de Vigo até Os Cantóns.
Segundo fontes de Erguer as cifras de seguimento da greve estudantil sitúanse entre o 90% no ensino medio e o 95% no universitario.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.