Por gcdeportes | A Coruña | 14/04/2016 | Actualizada ás 11:24
Como contra Ecuador no 2006 e contra Irán no 2008, a Selección Galega absoluta voltará a Riazor para a súa reestrea, sete anos e medio despois, o vindeiro 20 de maio con Venezuela. Así o anunciou Rafael Louzán, presidente da Federación Galega de Fútbol, na súa comparecencia nun hotel da Coruña. As obras de remodelación no estadio municipal de Balaídos foron decisivas para inclinar a balanza cara á Coruña. “Entendiamos que había dúas posibilidades pola presenza de Venezuela. Unha era Riazor e outra Balaídos. Eleximos Riazor polas obras de Balaídos”, argumentou Rafael Louzán, quen destacou a predisposición absoluta tanto de Deportivo como Celta para o regreso da Selección Galega.
Asemade, o presidente da Futgal anunciou que os seleccionadores de Galicia ante Venezuela serán Fran González, ex–xogador do Deportivo, e Míchel Salgado, ex do Celta. “Fran e Míchel Salgado teñen título de adestrador, e foron xogadores internacionais, dous emblemas do fútbol galego recente”, xustificou a escolla.
Louzán, que dixo levar meses traballando en silencio na volta da Selección Galega, recoñeceu contactos con Venezuela, Paraguai, Uruguai, Costa Rica, Qatar e Emiratos Árabes, pero que das opcións estudadas Venezuela era a que ofrecía “as mellores condicións”. A selección Viñotinto estará cinco días de concentración no noso país, onde preparará a súa participación na Copa América Centenario, que se disputará en xuño en Estados Unidos. O Galicia-Venezuela de Riazor servirá de presentación para o seu novo técnico, Rafael Dudamel.
Rafael Louzán destacou os lazos de unión entre Venezuela e Galicia, con miles de galegos emigrados no país sudamericano e ata 8.000 venezolanos asentados no noso país: “É a unión das dúas Galicias, a de aquí e a de acolá”.
O presidente da Futgal, como tantas outras veces, lembrou que os partidos da Selección Galega na época do Goberno bipartito custaron “entre 800.000 e un millón de euros”, pero agarda que a cita deste ano estea por debaixo desa cifra. Sobre o presidente da Xunta, Alberto Núñez Feijóo, Louzán asegura que deu o seu visto e prace ao regreso da Selección Galega.
Ademáis, o dirixente da Federación Galega anunciou para a vindeira pre-tempada un derbi entre Celta e Dépor en Sudamérica, sendo “Arxentina ou preto” o escenario máis probábel. A data está pendente da clasificación final do Celta, e a súa clasificación para competición europea.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.