Fene presenta Os Asentos Máis Duros do Mundo
Trátase de catro bancos de pedra situados no Miradoiro do Coto do Rei, un lugar desde o que se divisa toda a Ría de Ferrol.
Por Galicia Confidencial | Fene | 27/04/2016 | Actualizada ás 12:00
Este sábado o Concello de Fene terá un novo punto turístico do que presumir; Os Asentos Máis Duros do Mundo. Trátase duns bancos de pedra colocados no Miradoiro do Coto do Rei, no monte Maxarrón, en Sillobre.
Neste punto, a 354 metros de altitude, as vistas son impresionantes xa que se divisa toda a Ría de Ferrol. Os novos bancos son catro asentos de pedra estratexicamente situados, “e co máximo respecto do lugar, para poder desfrutar da marabillosa vista”, apunta a Asociación de Montes do Maxarrón.
O acto, que terá lugar este sábado, será oficiado polo alcalde de Fene, o nacionalista Juventino Trigo e nel intervirá o escritor, xornalista e comuneiro, Ramón Loureiro. Previamente haberá unha plantación colectiva de acivros.
