A conselleira de Medio Rural ao BNG: "Parece que non saíron do rural de barro e carros"
O Bloque denuncia que a empresa requira 250 millóns para crear 250 empregos, a millón de euros por posto de traballo, unha subvención total equivalente a "25 anos de axudas de desenvolvemento rural"
Por Europa Press / Redacción | SANTIAGO DE COMPOSTELA | 07/05/2025 | Actualizada ás 19:20
A conselleira do Medio Rural, María José Gómez, respondeu a críticas do BNG ao proxecto de Altri en Palas cunha defensa de "un rural vivo e con futuro" no que "o desenvolvemento industrial e a sustentabilidade convivan en harmonía". "Un rural moderno, acorde coa sociedade actual e non de hai un século, un rural de barro e carros de onde parece que vostedes aínda non saíron", espetou aos nacionalistas.
No pleno do Parlamento, Secundino Fernández (BNG) reclamou á conselleira que se sitúe sobre este proxecto que considera prexudicial para o rural da comarca da Ulloa, onde hai 3.000 explotacións, 4.000 traballadores agrarios e a denominación de orixe protexida de queixo Arzúa-Ulloa. "Non abre o pico nin defende á xente do rural", recriminou.
O Bloque denuncia que a empresa requira 250 millóns para crear 250 empregos, a millón de euros por posto de traballo. Unha subvención total equivalente a "25 anos de axudas de desenvolvemento rural", un "asalto ás arcas públicas" que identifica o "capitalismo de amigotes".
Respecto diso, a conselleira defendeu a "necesidade" de proxectos industriais "a condición de que" cumpran criterios ambientais e a normativa vixente.
María José Gómez defende a "transparencia" do proxecto e a "independencia" de técnicos, polo que "non hai nada que ocultar". Así, sinala ao Bloque por "estar detrás da pancarta do non", pois "o non permanente só leva a retroceso e empobrecimiento".
