Alerta do SLG: aumento "significativo" de raíñas da avespa velutina
O Sindicato Labrego Galego (SLG) asegura que en 2024 a vespa velutina "adaptou o seu ciclo ao clima e os niños tiveron un desenvolvemento menor"
Por E.P. | SANTIAGO DE COMPOSTELA | 15/05/2025 | Actualizada ás 18:33
O Sindicato Labrego Galego (SLG) alertou dun aumento "significativo" de raíñas de avespa velutina capturadas esta primavera e cuestiona o que considera un "triunfalismo" por parte da Xunta tras un 2024 "onde as circunstancias climáticas deron unha certa tregua".
"A realidade é que a avespa velutina non fixo tantos niños secundarios como en anos precedentes e, por tanto, son máis difíciles de localizar por parte dos veciños, o cal non significa que a súa presenza se reducise".
"Simplemente que no ano 2024 adaptou o seu ciclo ao clima e os niños tiveron un desenvolvemento menor, pero non influíu no ciclo de fecundación e creación de raíñas para a tempada seguinte xa que este número vén determinado polo número de niños existentes non polo tamaño destes", explica o apicultor e integrante da executiva nacional do SLG, Brais Álvarez.
Mentres, indica que nas últimas semanas están a ver como o número de raíñas trampeadas "é maior que en anos pasados". "Polo que resulta especialmente intranquilizador que este ano a Xunta deixase o trampeo en mínimos", considera o SLG, e destaca que "moitas brigadas antiincendios, que viñan realizando este traballo, este ano non foron dotadas do material correspondente", sostén.
