S.O.S na Limia: a produción do cereal case perdida e a da pataca moi atrasada por mor da chuvia
O alcalde de Xinzo reclama a administracións limpeza de canles e calcula que só se puido sementar un 1% de 3.800 hectáreas.
Por Europa Press / Redacción | SANTIAGO DE COMPOSTELA | 17/05/2025 | Actualizada ás 17:00
Centos de produtores da comarca ourensá da Limia temen pola colleita da pataca deste ano ao non poder iniciar a sementeira en leiras "impracticables" polas choivas de primavera. Nunha entrevista con Europa Press, o alcalde de Xinzo, Amador Díaz Penín, calcula que só se puido sementar un 1% das 3.800 hectáreas destinadas a pataca, onde se recollen 120 millóns de quilos de tubérculo. Alerta dunha situación "complexa" e "problemática", xa que "o normal é empezar a sementar sobre o 20 de abril", de modo que "a día de hoxe debería estar plantado entre o 70%-80%".
Lembra que en 2024 xa pasou algo similar, pero esta primavera de choivas foi peor. Pon como exemplo que a comezos desta semana "chegaron a caer 35 litros", polo que está "todo alagado", con "canles e ríos desbordados". Apunta que hai máis de 300 produtores e case todos padecen esta situación.
Así mesmo, en conversación con Europa Press, o coordinador provincial de Unións Agrarias, Carlos Basalo, relata que "as choivas máis fortes foron en Semana Santa, pero séguese con eses problemas porque non viñeron días de sol e as parcelas continúan impracticables para poder entrar a facer os traballos, sementar a pataca sobre todo". Tamén apunta Basalo aos problemas para os cereais, pois "algúns de primavera estaban sen sementar", ademais de que "os de inverno que estaban sementados tamén van morrer pola cantidade de auga e tanta humidade que non van deixar que saian para arriba".
INICIO DE SEMENTEIRA TARDÍO EN XUÑO
O feito é que haberá que esperar "entre 10 e 15 días" desde que pare de chover para poder empezar a sementar, o que se vai xa a xuño. O ciclo da pataca é de entre 90 e 120 días, polo que "se no outono empeza a chover antes, pois a dificultade estará en sacalas", razoa o rexedor. Ademais "o cereal de primavera xa debería estar sementado". "Hai moitos agricultores sopesando sementalo ou non porque cando se poida acceder non será tempada idónea", opina Díaz Penín.
Nesta liña, o membro de Unións Agrarias fala dunha situación "complicada" para os agricultores da Limia "porque moita da pataca non vai poder ir", xa que "se segue chovendo, moitos non van poder ir sementar ata xuño e vai ser moi tarde". "Incluso a xente que tivo a sorte de sementar antes está a valorar que, se cadra, esa pataca non vai saír ou que moito do cereal vai morrer", incide.
E é que Carlos Basalo expón "dous problemas fundamentais" que suceden cando a pataca se planta tarde: por unha banda, "teñen un valor menor", xa que "a xente busca pataca temperá"; ademais de que dará lugar a unha recollida en outubro, cando "pode ser que se teña o mesmo problema de que veñan choivas e tampouco se poida entrar a recollelas, co cal o risco é maior".
Conta que A Limia "é unha zona moi inundable" na que "hai que ter moito coidado", dado que se entra ao campo "con maquinaria pesada" e "non é bo sementar coa terra moi mollada". "A xente ten a semente comprada e está a esperar para poder entrar", agrega.
RECLAMAN LIMPEZA DE CANLES
Un dos puntos sobre os que chama a atención o alcalde de Xinzo de Limia é a "loita" na que levan "moito tempo" denunciando a falta de limpeza de canles por parte das administracións competentes. "Non entendo á Confederación (Hidrográfica do Miño-Sil) nin ás consellerias que teñen competencias de limpezas de canles e ríos", critica, pois "hai pobos do municipio de Xinzo nos que se fixo a concentración hai 40 anos e non se volveu a tocar".
Lamenta que a Confederación Hidográfica, de competencia estatal, actúe en "un traballo silvícola dunha árbore seca" pero non se "tome moi en serio que estean limpos as canles". "Ao final está todo alagado e estanse producindo arrastres das propias leiras cara ás canles, e se iso estivese limpo non habería eses arrastres", razoa.
Pola súa banda, Unións Agrarias fai un chamamento ás administracións a que actúen ante a "falta de limpeza nas canles e toda as infraestruturas que axudan a evacuar a auga", o que "é patente". "Que fagan esas limpezas anuais, ou cada uns cuantos anos, porque despois axuda un pouco a que a auga se vaia antes", apostila.
PROBLEMAS COA PAC
Outro aspecto que provoca "moitos problemas" é o das axudas da Política Agraria Común (PAC) ao non "ser posible" saber canto terreo van sementar e "algunha xente terá que tomar a decisión de deixalo a poula este ano", relata o responsable provincial de Unións Agrarias.
O SINDICATO LABREGO PIDE "UNHA INTERVENCIÓN URXENTE" Á Xunta
Precisamente, esta mesma semana o Sindicato Labrego Galego (SLG) pediu unha "intervención urxente" na Limia á Consellería do Medio Rural. "A campaña de cereal na Limia xa está perdida. E a da pataca está pendente dun fío. Nun 80% das leiras dedicadas a cereal non vai haber colleita. E no caso das patacas están compradas as sementes, que é o principal custo de produción, pero non se sabe se se van a poder sementar", deste xeito resume a situación o responsable local do SLG, Anxo Pérez Rúa.
Resalta que as explotacións da zona xa chegaron a este inverno nunha situación económica "moi delicada" despois dun 2024 "desastroso" no cereal no que non se cubriron custos de produción, ao que se sumaron as copiosas precipitacións de inverno e primavera. Por tal motivo, alerta de que as granxas encadean un ano de perdas nas colleitas, ademais de subidas de custos de produción "sen ningún apoio". Ante este escenario, Pérez Rúa ve necesario que Medio Rural active "un plan de accións para afrontar estas dificultades e medidas coordinadas con outras administracións".
