A Xunta ofrece ao presidente da multinacional chinesa Citic "as facilidades" que ofrece Galicia para facer investimentos
O grupo chinés é o propietario da planta Citic Censa do Porriño, un referente internacional no ámbito da caldereiría pesada e cunha traxectoria que se remonta a 1965.
Por Europa Press / Redacción | VIGO | 19/05/2025 | Actualizada ás 19:12
As conselleiras de Medio Ambiente e Cambio Climático, Ángeles Vázquez, e de Economía e Industria, María Jesús Lorenzana, reuníronse este luns co presidente da multinacional chinesa Citic Group Corporation, Xi Guohua, e outros representantes da compañía, na que trasladaron "as facilidades e oportunidades" que ofrece Galicia para facer investimentos, á vez que avaliaron as existentes no mercado chinés.
Este encontro, que dá continuidade ao mantido o domingo polo presidente da Xunta, Alfonso Rueda, pretende reforzar as relacións económicas entre as partes. O grupo chinés é o propietario da planta Citic Censa do Porriño, un referente internacional no ámbito da caldereiría pesada e cunha traxectoria que se remonta a 1965.
Nun comunicado, a Xunta explica que as conselleiras trasladáronlle aos responsables da corporación chinesa "a importancia que ten para Galicia contar con empresas que xeren riqueza e emprego de calidade na comunidade, comprometidas co medio ambiente e que aposten constantemente polo I+D+i, pois esa maneira de traballar provoca un efecto tractor no resto do tecido produtivo existente na contorna".
