A nova sala de radioloxía vascular do Hospital de Ferrol permite asumir procedementos complexos sen derivar á Coruña

O Hospital Arquitecto Marcide de Ferrol (CHUF) conta dende o pasado setembro cunha nova sala de radioloxía vascular intervencionista, que xa permitiu realizar 635 procedementos especializados sen necesidade de derivacións ao Hospital Público da Coruña, como sucedía anteriormente. A unidade foi presentada este sábado polo conselleiro de Sanidade, Antonio Gómez Caamaño, durante unha visita institucional ao centro.

A sala permite realizar intervencións vasculares e cardiolóxicas complexas de forma minimamente invasiva, como subliñou a radióloga do CHUF, Sara Lojo, quen destacou que a radioloxía vascular "axuda ao resto de especialidades a tratar patoloxías con garantías similares á cirurxía clásica, pero cun menor impacto para o paciente". Segundo precisou, trátase dun campo en expansión, cuxo desenvolvemento está permitindo mellorar a eficiencia e a calidade asistencial.

Durante os primeiros meses de funcionamento, a unidade rexistrou 189 intervencións cardiolóxicas e 446 radiolóxicas, entre as que sobresae a colocación de marcapasos, unha técnica que anteriormente obrigaba a desprazar pacientes da área de Ferrol a outros hospitais da rede pública galega.

O conselleiro Caamaño destacou a importancia de contar con este servizo avanzado no propio CHUF e fixo fincapé na “calidade dos profesionais” que integran o equipo, composto por unha radióloga vascular intervencionista, dous enfermeiros especialistas en radiodiagnóstico e dous técnicos responsables das probas co novo equipamento.

A posta en marcha desta sala responde á estratexia da Xunta para descentralizar procedementos de alta complexidade, reducir os desprazamentos de pacientes e mellorar o acceso a tecnoloxías punteiras nas distintas áreas sanitarias. O investimento forma parte do compromiso do SERGAS por dotar aos hospitais comarcais de servizos que garantan equidade e calidade asistencial en todo o territorio galego.