O PPdeG envórcase con Feijóo e colleita 8.400 avais, case 3.000 máis que en 2022
Faino nun momento no que é moi cuestionado dentro do seu propio partido.
Por Europa Press / Redacción | SANTIAGO DE COMPOSTELA | 27/05/2025 | Actualizada ás 10:04
O PP galego suma para o actual líder do PP, Alberto Núñez Feijóo, quen aspira á reelección no congreso estatal que en xullo celebrará o partido, case 8.400 avais, unha cifra moi superior aos achegados antes do conclave de Sevilla que selou o seu salto á política nacional. Fontes do PPdeG consultadas por Europa Press ratificaron que Feijóo logrou 8.379 firmas de afiliados da súa comunidade de orixe, case 3.000 máis (5.679) que cando relevou a Pablo Casado tras unha crise interna de calado nas filas populares.
Que "Galicia nunca falla" o verbalizaron tanto o agora líder do PPdeG e presidente da Xunta, Alfonso Rueda, como o propio Feijóo no acto que protagonizou o pasado sábado no Pino (A Coruña), unha 'romaría' organizada polo PP provincial da Coruña con máis de 4.000 simpatizantes.
Precisamente, o presidente provincial do PP da Coruña, Diego Calvo aproveitou o acto para entregar a Feijóo un agasallo en forma de caixa de avais recollidos grazas á implicación de alcaldes e portavoces da provincia. Nela había, dixo, máis de 2.000 firmas ao seu favor.
Na propia 'romaría' montouse unha mesa para a recollida de avais, que o xefe de filas do PP visitou nada máis chegar á 'carballeira' da Magdalena e onde chanceou con quen estaban na mesma. "Que? Como imos?", preguntou. Este martes os populares galegos trasladaron que recompilaron case 8.400 firmas para el.
