Por gcdeportes | Lugo | 25/05/2016 | Actualizada ás 23:50
Ficha técnica:
CD Numancia 1: Munir; Unai Medina (Regalón, 22’), Orfila, Juanma, Ripa; Antonio Martínez (Pablo Valcarce, 39’), Gaztañaga, Iñigo Pérez; Mateu, Dani Aquino (Álex Alegría, 72’) e Vicente.
CD Lugo 0: Roberto Fernández; Álvaro Lemos, Israel Puerto, Carlos Hernández, Fernando Vega; Seoane, Carlos Pita, Campillo (Sergio Marcos, 49); Igor Martínez (Abel Molinero, 84), Jonathan Pereira e Joselu.
Gol: 1-0: Pablo Valcarce (minuto 43).
Árbitro: Sagüés Oscoz (colexio vasco). Amarelas a Carlos Hernández (20’) e Fernando Vega (78’) nos lucenses.
Incidencias: partido da 40ª xornada de Segunda División no estadio Los Pajaritos ante apenas 2.000 espectadores. David De Coz, que ía ser titular, lesionouse no quentamento.
Roberto Fernández, o mellor dos lucenses, berraba aos seus compañeiros esixíndolles máis intensidade e concentración en defensa. O Lugo só tirou unha vez entre os tres paus e o Numancia puido marcar máis goles. Chegoulle co solitario tanto de Pablo Valcarce pouco antes do descanso. A mellor ocasión lucense foi un rexeite de Mateu cara a súa propia portaría no minuto 89. Coa derrota en Soria, o Lugo di adeus as súas opcións de loitar polo play-off de ascenso. Buscará o domingo despedir a campaña no Anxo Carro cunha vitoria fronte ao Nástic de Tarragona, que lle daría o record de puntuación en Segunda.
O Lugo tiña aínda algunha posibilidade de meterse entre os seis primeiros, pero o Numancia xogou con máis intensidade e determinación, malia que os lucenses tiveron a primeira ocasión de perigo, pero o centro atrás de Jonathan Pereira non atopou rematador. O Numancia foise pouco a pouco impoñendo, e Roberto converteuse en protagonista, con cinco paradas no primeiro tempo. A mellor foi cun xeonllo nun man a man con Vicente. O gol chegou no minuto 43, tras un disparo de Pablo Valcarce que petou en Carlos Pita e acabou no fondo da rede.
Foi máis aberta a segunda parte, por momentos un partido de ida e volta. Sergio Marcos entrou por un desaparecido Campillo, pero estiveron os locais máis preto de marcar o segundo que o Lugo de empatar. O Numancia puido sentenciar en dúas ocasións seguidas de Aquino e Vicente (minutos 51 e 52). A réplica chegou nun remate coa testa de Igor Martínez e un disparo cruzado de Jonathan Pereira. Roberto evitou o tanto de Íñigo Pérez e Aquino rematou coa testa á trabe da portaría lucense. A piques de cumprirse o minuto 70, o primeiro disparo entre paus do Lugo, obra de Joselu. Roberto evitou de novo o gol de Mateu, e Íñigo Pérez e Aquino tiveron de novo ocasións. A mellor ocasión lucense chegou a piques de cumprirse o minuto 90, nun despexe de Mateu cara a súa propia portaría que saiu preto do pau dereito de Roberto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.