Por gcdeportes | A Coruña | 28/05/2016 | Actualizada ás 08:49
Emre Çolak, mediapunta de 25 anos procedente do Galatasaray, será o primeiro xogador turco na historia do Deportivo. Antes incluso de anunciar quen será o adestrador deportivista para a vindeira campaña, o club coruñés desvelou a súa primeira fichaxe para o curso 2016-17. Çolak remataba contrato co seu equipo, con quen o xoves gañou (1-0) a Copa turca sendo titular ante o Fenerbahçe, e rexeitou a última oferta de renovación do seu club de toda a vida para fichar por tres tempadas polo Deportivo.
Zurdo habilidoso, con gran mobilidade e calidade técnica pero pouco físico (1,68 de estatura), Emre Çolak, que cumpriu 25 anos a semana pasada (20 de maio de 1991), disputou 30 partidos esta tempada, 18 de liga, nove de Copa, dous de Champions e a Supercopa, con tan só tres goles e tres asistencias. Toda a súa carreira desenvolveuse no Galatasaray, de onde agora sae para tentar triunfar co Deportivo.
A súa posición natural é centrocampista de ataque, sobre todo na mediapunta ou pola esquerda, aínda que esta campaña acabou xogando de mediocentro. Çolak vestiu a camisola da selección turca nas categorías inferiores e chegou a xogar dous partidos coa absoluta, pero no 2012.
Çolak poderá gozar a vindeira tempada co seu primeiro derbi galego, pero xa sabe o que é marcar un gol ao Celta. O pasado verán, na xira europea de pretempada, o Celta enfrontouse ao e o agora deportivista marcou o 1-0 cun penalti ao estilo Panenka.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.