Por Galicia Confidencial | Santiago de Compostela | 28/05/2016 | Actualizada ás 15:42
A Coordinadora Nacional de Anova-IN reuniuse hoxe sábado, 28 de maio de 2016, en Teo. O partido de Xosé Manuel Beiras lanzou unha mensaxe ambivalente aos seus socios de En Marea. Por unha parte, de apoio, chamando a contruír a coalición dende a base. Por outra, de distanciamento, advertindo que entre esas mesmas bases existe a demanda dunha “democratización e territorialización de En Marea, para facer desta confluencia un ente moito máis participativo, moito máis plural, no que funcione a democracia de base e o asemblearismo no sentido estrito”.
Xosé Manuel Beiras expresou esta demanda dunha “unidade popular real” advertindo que aos seus socios que ANOVA ten “límites”. “Hai límites éticos, está claro?”, incidiu en declaracións aos medios tras a reunión.
O líder dos nacionalistas dixo que a coalición non está en perigo pero repetiu que os outros socios -Podemos e Esquerda Unida- deben avanzar tamén no proceso de institucionalización de En Marea como suxeito propio. Proceso que ANOVA quería plasmar nun partido instrumental para as xerais. Un obxectivo ao que final tivo que renunciar malia ser o preferido pola súa militancia. Para Beiras isto supón unha contradición co discurso “de asamblearismo, de libre decisión, de decisión dos pobos e de que o pobo é o que máis ordena".
"O que pasa é que temos que ser moi conscientes de que hai un inimigo común que hai que derrotar. Anova opera con este criterio e damos exemplo e, por tanto, os demais cadros políticos, aqueles que non operen así, é a súa responsabilidade. Nós apostamos pola unidade popular e non está en perigo a unidade popular”, declarou o veterano político quitándolle ferro a situación.
En definitiva, ANOVA parece disposta a implicarse na campaña de En Marea pero non oculta que está decepcionada coa postura dos seus socios. Lastrará isto os resultados? Beiras responde que repetir o éxito do 20D o vindeiro 26 de xuño "depende de facelo ben, de que funcionemos en cooperación entre todos os sectores, organizados ou non, e que nesa pluralidade teñamos moi claro o inimigo para bater e a prioridade absoluta".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.